Қызылордалық шенеуніктер өнер орталықтарына келуші балаларды күнделікті электронды бақылаудан өтуге міндеттеп жатыр. Ата-аналар бұл жаңалыққа жаппай қарсы. Айтуларынша жеткіншектердің бет әлпетін сканерлейтін бағдарламаның кем-кетігі көп көрінеді. Оның үстіне ата-ананың рұқсатынсыз балалардың биометриялық мәліметін алу барып тұрған заңсыздық дейді көпшілік, деп хабарлайды деп хабарлайды postskript.kz Ақпараттық агенттігі.
Айтуларынша, шенеуніктер өнер үйірмесіне баратын жеткіншектердің биометриялық мәліметін алуға бізден рұқсат та сұрамады деп ашынады. Жаңа жоба әсіресе мүмкіндігі шектеулі балаларға қиындық туғызайын деп тұр екен.
Менің балам бір күн келеді, екі күн ауырады. Өйткені ол ерекше бала. Енді 1 күн барып, екі күн қалатын болса, суретке түсіретін болса үш суретке түспегеннен кейін оны автоматты түрде шығарып тастайды екен. Мен оған қарсымын түбегейлі.
– деді АҚМАРАЛ МАХАМБЕТОВА, ҚЫЗЫЛОРДА ҚАЛАСЫНЫҢ ТҰРҒЫНЫ.
Әр баланы күнделікті фейс бақылаудан өткізу өнер орталығындағы тәлімгерлердің де жұмысын қиындатқан. Оның үстіне мұндай қызмет келісім-шартта көрсетілмеген. Сөйте тұра әкімдіктегілер бізді мәжбүрілеп отыр дейді артспорт үйірмесінің қызметкерлері. Ал жауаптылар бұл мемлекеттің мол қаражатын үнемдеу мақсатында жасалып отыр дегенді айтады.
Былтырлары құқық қорғау органдары тарапынан тексеру жұмыстары жүргізілді. Сол кезде бізде көптеген заңбұзушылықтар анықталды. Оның ішінде жалған балаларды тіркеу фактілері көптеп кездесті. Бұл жобаның енгізілу мақсаты бұл жерде бюджет қаражатын тиімді пайдалану. Және мақсатты пайдалану.
– деді СЕРІК ЖҰМАТ, ҚЫЗЫЛОРДА ОБЛЫСЫ МӘДЕНИЕТ, МҰРАҒАТ ЖӘНЕ ҚҰЖАТТАМА БАСҚАРМАСЫ БАСШЫСЫНЫҢ ОРЫНБАСАРЫ.
Шенеуніктер алдағы уақытта бағдарламаның кемшіл тұстарын өзгертуге ықпал жасаймыз деп сендірді. Бұл бағдарлама тамыз ай бойы пилоттық жоба болып, қыркүйектен бастап заңды енгізілмекші екен. Айта кетейік, Қызылорда облысында былтырғы жылы балабақшаларға қатысты Фейс-Ай-Ди бағдарламасы пилоттық болып енгізіліп соңы ұлы айқайға ұласқан еді. Қазір 16 ай өтсе де жоба әрі қарай жылжымай отыр.
