Роза Бағланова атындағы аудандық мәдениет үйінде өткен шараға аудан әкімі Мейрамбек Шермағанбет қатысып, сала қызметкерлері мен ардагерлерін мерекемен құттықтады.
-Баршаңызды Мемлекеттік қызметшілер және Қазақстан полициясы күні кәсіби мерекелеріңізбен шын жүректен құттықтаймын! Жауапты міндет жүктелген мамандықты меңгеріп, қазыналы Қазалы жерінің көркеюі, аудан экономикасының дамуы, қоғамның қауіпсізідгі мен елдің тыныштығын сақтау жолында талмай еңбек етіп жатқан Сіздерге шынайы ризашылығымды білдіремін. «Басты міндет – елге қызмет!» деген мазмұны терең, жауапты сөзді еске сала отырып, мемлекеттік қызметші, полиция қызметкері деген абыройлы атақтарға үнемі лайықты болуларыңызға тілектеспін. Халықтың әл-ауқатын жақсарту, елдің тыныштығын сақтау жолында жасап жатқан игілікті істеріңізбен көпшіліктің алғысына бөлене беріңіздер, — деді аудан басшысы.
Мерекелік шарада туған жердің дамуы мен қоғамның тыныштығы жолында аянбай қызмет етіп жүрген бірқатар азаматтарға облыс және аудан әкімінің, ҚР Мемлекеттік қызмет істері агенттігінің Қызылорда облысы бойынша департаменті басшысының «Алғыс хаты» мен «Қызмет» салалық кәсіподағының «Мемлекеттік қызметтің дамуына қосқан үлесі үшін» төсбелгілері табысталды.
Салтанатты шара мұнан соң концерттік бағдарламаға ұласып, аудан өнерпаздары мереке иелеріне ерекше мерекелік көңіл-күй сыйлады.
Айта кетейік, бүгінгі таңда Қазалы ауданы бойынша мемлекеттік қызметкелердің нақты саны – 163, оның ішінде ер қызметкерлер саны 128, әйел азаматтар саны 35 бірлікті құрайды. Ауданда 51 мемлекеттік қызметші 29 жасқа дейінгі жастар. Ал, ауданымызда 100-ден астам полиция қызметкері қоғам тыныштығын сақтау жолында абыройлы қызмет етіп келеді.
