Жиында Жалғас Оңғарұлы алдымен Жолдауда айтылған барлық бағдар бойынша нақты шаралар қабылдап, оны сапалы іске асыру бағытында жұмыс жасау керектігін айтты. Осыған сәйкес, Жолдаудан туындайтын міндеттер мен оны аудан көлемінде жүзеге асыру мәселелеріне байланысты аудан әкімінің орынбасарлары, дербес бөлім басшылары мен кент, қала және ауылдық округ әкімдеріне берілген тапсырманың сапалы орындалуын қадағалауды тапсырды.
Мұнан соң мәжілістің күн тәртібіндегі екінші мәселе аудан көлемінде жол қауіпсіздігін сақтау бойынша жасалып жатқан жұмыстар туралы аудандық полиция бөлімінің бастығы Асылбай Аңсатов баяндады.
Жыл басынан бері аудан көлемінде 58 жол-көлік оқиғасы орын алып, оның ішінде жаяу жүргіншілермен 18 жол көлік оқиғасы тіркелген. Бұған байланысты ауданда жол қозғалысы ережесін өрескел бұзушыларды анықтау бағытында «Қауіпсіз жол», «Автобус», «Мас жүргізуші қылмыскер», «Заңсыз қайта жабдықтау» «Құқық тәртібі» арнайы жедел-профилактикалық іс-шаралары өткізіліп келеді.
Жалғас Оңғарұлы полиция бөлімінің бастығына жол-көлік оқиғаларының алдын алу, профилактика бағытындағы рейдтік шараларды күшейтіп, жедел басқару орталығының мүмкіндігін толық пайдаланып, жолдағы тәртіпті сақтау бағытында шаралар қабылдауды тапсырды. Сонымен қатар тиісті сала басшылары мен кент, қала және ауылдық округ әкімдеріне аудан бойынша әлеуметтік нысандар, мектеп-балабақшалардың алдында, қоғамдық орындарда жол белгілерін орнатып, уақытылы жаңартып отыру, автомобиль жолдары мен көшелерді салу, реконструкциялау, жөндеу және күтіп-ұстау жұмыстарының сапасын қатаң бақылау мен басқа да жол қауіпсіздігінің алдын алу мақсатында нақты тапсырмалар берді.
