Аталған жоба аясында ауданымыздағы Сарбұлақ, Шилі, Шәкен және Шитүбек елді мекендерін ауыз су желісіне қосуға республикалық, облыстық бюджеттен және қайтарылған активтер қаражаты есебінен барлығы – 1,5 млрд. теңге қаржы бөлініп, бүгінде құрылыс жұмыстары толықтай аяқталып отыр.
Бүгінде Қазалы ауданындағы Шәкен ауылына қарасты Шилі елді мекеніне таза ауыз су жеткізіліп, шалғай елді мекеннің тұрғындары көпткен күткен қуанышына қол жеткізуде.
Елді мекенді ауыз су желісіне қосу рәсімінде аудан әкімі Алмасбек Есмаханов тұрғындардың өмір сапасын арттыру бағытында атқарылған жұмыстарға тоқталып, құттықтауын жеткізді.
-Президентіміз Қасым-Жомарт Кемелұлының қолдауымен, аймақ басшысы Нұрлыбек Машбекұлының басшылығымен өңірімізде ауыл халқының табысын арттыру, тұрмыс-тіршілігін жақсарту бағытында жүйелі жұмыстар атқарылуда. Бүгін елді мекенді ауыз суға қосу рәсімі осы жұмыстардың бір бөлігі. Бұдан бөлек біз Қарашеңгел ауылдық округіне қарасты Шитүбек елді мекенін ауыз су желісіне қоссақ, жуық арада шалғай елді мекендер Сарбұлақ және Шәкен ауылдарыда ауыз су желісіне қосылады. Осы жұмыстардың нәтижесінде биыл Қазалы ауданы Мемлекет басшысының тапсырмасына сәйкес 100 пайыз таза ауыз сумен қамтылатын болады. Осы орайда, елді мекенінің ауыз су желісіне қосу жұмыстарымен айналысқан мердігер мекеме «Намыс-Құрылыс» жауапкершілігі шектеулі серіктестігінің құрылысшыларына және осы игі іске атсалысқан барша азаматтарға алғысымды білдіремін. Қуаныштарыңыз құтты болсын, — деді аудан әкімі.
Шилі елді мекенін ауыз су желісіне қосу шарасында ауыл шаруашылығы саласының ардагері Берік Бисенбаев көптен күткен игіліктің іске асуымен құттықтаса, ауыл ақсақалы Әзілхан Үмбетов барша азаматтарғабатасын берді.
Шарада ауданның дамуына елеулі үлес қосқан азаматтар мен ауыз су тарту жұмыстарын сапалы әрі мерзімінде жүргізген мердігер мекеме қызметкерлері аудан әкімінің «Алғыс хатымен» марапатталды.
