Өткен жылдың желтоқсан айында аймақ басшысы Нұрлыбек Нәлібаевтың тікелей қолдауымен және облыстық денсаулық сақтау басқармасының бастамасымен аудандық аурухана жанынан облыстық деңгейде қызмет көрсететін жаңа емдеу ғимараты іске қосылды. Паллиативті бөлімше ашылғаннан бергі соңғы 6 айда 340 науқас ем қабылдаған.
— Жыл көлемінде аудан медицинасында елеулі жетістіктерге қол жеткізілді. Аудандық аурухана жанынан облыстық деңгейде науқастарды қабылдайтын “Паллиативтік көмек” және “Медициналық оңалту” бөлімшесі бар жаңа емдеу ғимараты пайдалануға берілді. Бөлімшенің материалдық базасы жетілдірілді, заманауи үлгідегі технологиялармен қамтылды. Ауыр хәлдегі науқастар мен ұзақ уақыт бойы оңалтуды қажет ететін жандарға тәулік бойы ем-шара жүргізілуде. Оңалту іс-шарасын жасауға барлық мүмкіндік қарастырылған. Мезгілімен науқастар ем қабылдап, дәрігер бақылауында болады. Қос бөлімшеде 5 дәрігер мен 50-ге жуық орта буын мамандары және кіші буын қызметкерлері бар. Сонымен қатар физио ем жүргіліп, логопед, психолог, массаж, емдік дене шынықтыру мамандары демалыс күндеріне қарамастан жұмыс жасайды. Айта кету керек, паллиативтік медициналық көмек көрсету бөлімшесі 60 төсек орынға арналған. Бөлімше қажетті медициналық құрал-жабдықтармен, дәрілік заттармен және медициналық бұйымдармен толық қамтамасыз етілген,- деді бас дәрігердің орынбасары Қанат Медетбаев.
Сонымен қатар, елді мекенде тұрмыстық қатты қалдықтар палигоны салынды. Бұл жоба экологиялық тұрақтылықты қамтамасыз етуде маңызды рөл атқарады.
— Тереңөзек кентінде тұрмыстық қатты қалдықтар палигонының құрылысы 2024 жылы жүргізілді. Бұл жоба желтоқсан айында пайдалануға берілді, оның құны 475 млн теңгені құрайды. Палигонның бір ерекшелігі — мұнда тұрмыстық қатты қалдықтарды сұрыптау қондырғылары орнатылған. Яғни, бұл жерде пластик, шыны, темір және басқа да қайта өңдеуге жататын қоқыстар осы жерде сұрыпталып, тиісінше өңдейтін орындарға жөнелтіледі, — деді Тереңөзек кентінің әкімі Ержан Бақтияров.
@Қызылорда облысының Өңірлік коммуникациялар қызметі
