Осыған орай, аудан әкімнің міндетін атқарушы Жалғас Сүйеубаев пен аудан әкімінің орынбасары Дәурен Тлеумбетов және аудандық АХАТ бөлімінің басшысы Лига Наурызбаева Әйтеке би кентінде тұратын шаңырақ көтергендеріне 50 жыл болған Алтын той иелерінің шаңырағына барып, мерейлі мерейтойларымен құттықтады.
Алдымен берекелі ғұмырларымен елгі үлгі болған Бақытбек пен Күлай Қошқаровтардың шаңырағына барды. Әулет ардақтысы Бақытбек аға мен жұбайы Күлай анамыздың бақытты отбасының іргетасын бірге қалағандарына – 50 жыл.
Олар салиқалы ұрпақ тәрбиелеп, еткен еңбегі, көркем мінезімен өзгеге өнеге боларлық үлкен әулет иелері. Отағасы Бақытбек аға – ұзақ жылдар бойы ауыр еңбектен қаймықпай, КамАЗ тізгіндеп, ел игілігіне адал қызмет еткен еңбек адамы. Ал Күлай ана – сан мың жанға шипа дарытқан ақ халатты абзал жан. Медбике ретінде талай адамның алғысына бөленіп, зейнетке шыққан қадірлі ана. Бүгінде үлгілі отбасы атанып, 5 баладан өрбіген 10 немеренің қызығына бөленіп отырған ардақты жандар – көпке үлгі, кейінгі ұрпаққа – өнеге.
Мұнан кейін Болат пен Қуаныш Асаубаевтардың шаңырағына барып, құрмет көрсетті. Отағасы Болат Асаубаев құрылыс саласында еңбек етіп, бүгінде адал еңбектің зейнетіне жетіп отыр. Ал, Қуаныш апамыз өмір бойы мектепте жоғары санатты, білімді де білікті ұстаз болумен қатар жанұяда 9 бала тәрбиелеп, барлығына жоғары білім алып берген «Алтын алқа» иегері атанған Батыр ана. Берекелі отбасы бұл күнде дүниеге 4 қыз бен 5 ұлды әкелген, оларға өнегелі тәрбие беріп, осы 9 перзентін де өз тұғырларына қондырып отырған алып та мәуелі бәйтерек иелері.
Шаңырақ көтергендеріне 50 жыл болған берекелі отбасы иелеріне аудан әкімінің міндетін атқарушы Жалғас Сүйеубаев мерейтойлық құттықтауын табыстап, отасқандарына 50 жыл толуына орай неке куәлігі табыстады. Сондай-ақ қазақы дәстүрге сай иығына шапан жауып, камзол киігізіп құрмет көрсетті.
