Аудан орталығындағы «ROYAL PALACE» салтанат сарайында өткен шарада қазалылық жастардың қол жеткізген жетістіктері мен жоғары көрсеткіштер сараланды. Жастар форумына қазалылықтармен қатар, Қызылорда қаласы мен көршілес Арал ауданының жастары да шақырылды.
Басқосуға қатысқан аудан әкімі Алмасбек Есмаханов құттықтау сөз сөйлеп, қазалылық жастардың бағындырған белестерін ерекше атап өтті.
Бүгінгі жылды қорытындылауға арналған жастар форумы – бұл жай ғана басқосу емес, бұл – жасампаз ой мен жаңа идеялардың, ел ертеңіне деген сенімнің алаңы. Мемлекетіміздің болашағы – Сіздер, құрметті жастар! Сондықтан сіздердің ой-пікірлеріңіз, бастамаларыңыз, ел дамуына қосып жатқан үлестеріңіз – біз үшін аса маңызды. Мемлекет басшысы Қасым-Жомарт Кемелұлы Тоқаев: «Жастар қашанда және қай кезде де өзгерістің басы-қасында жүреді. Сіздер дүние әп-сәтте мың құбылатын заманда өмір сүріп жатсыздар. Жастардың өздерін танытуына мүмкіндік мол. Озық ойлы жастардың қоғам өміріне белсене араласуы, білімпаздығы, еңбек етуге және өзін-өзі дамытуға құштарлығы қуантады. Өйткені еліміздің бүгіні де, ертеңі де – сіздер», – деп, жастарға үлкен сенім артқан болатын. Шығыстың жарық жұлдызы, жалынды жастардың жетекшісі ретінде ел есінде қалған Ғани Мұратбаевтың ізгі істері мен мұрасын бүгінгі қазалылық жастар лайықты жалғастырып келеді. Бүгінде өңірімізде аймақ басшысы Нұрлыбек Машбекұлының қолдауымен Сыр жастарына үлкен қолдау көрсетіліп келеді. Жастардың жалынды жігерімен болашақтың іргетасын бірге қалауға, қолдау көрсетуге әрқашан дайынбыз, — деді аудан әкімі Алмасбек ӘБІЛҚАСЫМҰЛЫ.
Жастар форумында өз мамандығы бойынша әр салада жемісті еңбек етіп жүрген жалынды жастар облыс және аудан әкімінің, облыстық қоғамдық даму басқармасы басшысының Алғыс хаттарымен марапатталды.
Марапаттау рәсімінен кейін жастар форумы көңілді кешке, аудан өнерпаздарының керемет ән-шашуына ұласты. Сондай-ақ жайдарманшы Құттыбай Сағындықов өнер көрсетіп, аудандық форумның жоғары деңгейде өтуіне үлес қосты. Форум әрі қарай жастардың би кешіне ұласты.
