Шараға аудандық мәслихат төрағасы, облыстық және аудандық мәслихат депутаттары, аудандық ардагерлер кеңесінің төрағасы, шаруашылық құрылым басшылары, ауылдық округ әкімдері және еңбек ардагерлерімен бірге ақсақалдар қатысып, алқапқа алғашқы дән сеуіп, дихандарға сәттілік тіледі.
Дән себу шарасынан кейін жылдағы дәстүрге сай «Дала күні» семинар-кеңесі өтіп, онда аудандық ауыл шаруашылығы мен жер қатынастары бөлімінің басшысы Еркін Сейтов көктемгі егіске дайындық барысы туралы, ал «Қазалысушар» өндірістік учаскесінің басшысы Нұрлан Әбілдаев шаруашылықтарды сумен қамтамасыз ету мәселелері туралы хабарлама жасады.
— Биыл аудан бойынша 18 245 гектар жерге ауыл шаруашылығы дақылдарын орналастыру, ал, негізгі дақыл күрішті – 6436 гектарға егу жоспарлануда. Бүгінде оның ішінде 5536 гектар ескі жоңышқа толық тырмаланып, суғарылса, жоспарланған 2945 гектар жаңа жоңышқа, 200 гектар жаздық бидай, 40 гектар арпа және 495 гектар мақсары дақылдары толық егіліп күтімге алынуда. Семинар барысында тиісті сала басшыларына күріш егу науқанын оңтайлы мерзім ішінде аяқтау үшін ұйымдастыру шараларына аса мән беріп, барлық агротехникалық талаптарды қатаң сақтау қажеттігін ескерттім. Сондай-ақ шаруашылықтардың өткен жылдан қалған суға қарыздарын шұғыл өндіру, егінге малдардың түсуінің алдын алу сынды өзекті мәселелерге байланысты аудандық ауыл шаруашылығы бөлімімен, шаруашылық басшыларына және ауыл әкімдері мен басқа да жауапты сала басшыларына бірқатар тапсырмалар жүктелді. – деді МЕЙРАМБЕК ШЕРМАҒАНБЕТОВ, ҚАЗАЛЫ АУДАНЫНЫҢ ӘКІМІ.
