Роза Бағланова атындағы аудандық мәдениет үйінде өткен мерекелік шарада аудан әкімінің міндетін атқарушы Жалғас Сүйеубаев сөз сөйлеп, аудан жұртшылығын мерекемен құттықтады.
— Ата заңымыз – егемен еліміздің дербестігі мен саяси тұрақтылығын сипаттайтын тарихи құжат. Мұнда мемлекетіміздің барлық құрылымдарының, жеке азаматтардың, ұлт пен ұлыстардың мақсат-міндеттері көрсетілген. Ел тарихындағы маңызды құжат — Ата Заңымыз қабылдағаннан бері елімізде тарихи мәні зор талай іргелі істер атқарылып, дамудың даңғыл жолында маңызды жетістіктерге қол жеткізді. Елімізбен бірге киелі Сыр өңірі, оның ішінде Қазыналы Қазалы ауданында да аудан халқының игілігіне бағытталған айтулы істер, жарқын жобалар жүзеге асуда. Айтулы мереке қарсаңында өздеріңізге зор денсаулық, еңбектеріңізге табыс, отбасыларыңызға бақ-береке тілеймін. Ынтымақ атты ыстық ұғымды қастерлеген халқымыздың ырысы арта берсін, – деді Жалғас Оңғарұлы.
Мұнан соң мерекелік шарада ауданымыздың өсіп-өркендеуіне лайықты үлесін қосып жүрген бірқатар азаматтар облыс әкімі мен аудан әкімінің міндетін атқарушының «Алғыс хаттармен» марапатталды. Сонымен қатар мерекеге орай еңбек ардагері Ақжолан Балымбетовке ҚР Экология және табиғи ресурстар министрлігінің «Еңбек ардагері» медалі, Бозкөл ауылдық округінің әкімі Ақылбек Бөлебаевқа «Мемлекеттік қызметтің дамуына үлес қосқаны үшін» төсбелгісі табысталды.
Салтанатты шара соңы аудан өнерпаздарының концерттік бағдарламасына ұласып, патриоттық әндер шырқалды.
Айта кетейік, осыдан 30 жыл бұрын республикада бүкілхалықтық референдум өтіп, нәтижесінде Қазақстан Республикасының Конституциясы 1995 жылдың 30 тамызында қабылданды. Міне содан бері ел өміріндегі саяси әрі аса маңызды құжат саналатын Ата Заңымызға биыл 30 жыл толып отыр.
