Сыр өңірінің бай мәдени мұрасы мен ұлттық құндылықтарын кеңінен насихаттаған концерттік кешке жиналған көрермендер өнерпаздардың шеберлігіне жоғары баға берді. Шара барысында Сыр елінің әсем әндері шырқалып, күмбірлеген күйлері орындалып, тағылымды шығармалар көпшілік назарына ұсынылды. Өнер ардагерлері мен аудан өнерпаздарының сахналық шеберлігі көрермендердің зор қошеметіне ие болып, ерекше әсер сыйлады.
Кеш қорытындысында Батыс Қазақстан облысы әкімінің ықылас гүлі табысталып, облыстық мәдениет, тілдерді дамыту және архив ісі басқармасының Алғыс хатымен «Алтын қазына» ансамблі мен Сырдария квартеті марапатталды.
Сыр мен Жайықтың арасын өнер арқылы жалғаған мазмұнды мәдени кездесу қос өңірдің рухани байланысын нығайтып, мәдени ынтымақтастығын арттыра түсті. Көрермен көңілінен шыққан әсерлі кеш Сыр өнерінің мерейін үстем етіп, ұлттық өнердің өміршеңдігін тағы бір мәрте айшықтай түсті.
Сырдария ауданы әкімінің баспасөз қызметі
