Бұл жұмыстардың негізгі мақсаты – аудан тұрғындарына жайлы өмір сүру жағдайын жасау, көпқабатты тұрғын үйлердің техникалық жағдайын жақсарту және ортақ пайдаланылатын аумақтардың көркін арттыру.
Осы бағыттағы жұмыстардың барысымен бүгін аудан әкімі Алмасбек Есмаханов Әйтеке би кентіндегі Желтоқсан көшесінің бойында орналасқан №2 және №14 көпқабатты тұрғын үйлерге барып, шатырларды жөндеу жұмыстарымен танысты. Аудан басшысы құрылыс жұмыстарының орындалу барысын көріп, жауапты мамандармен пікір алмасты.
Қазіргі таңда аталған тұрғын үйлердің шатыр жабындарын ауыстыру жұмыстары жүргізілуде. Жөндеу жұмыстарына аудандық бюджеттен тиісті қаржы бөлініп, құрылыс жұмыстарын «АҢСАТ-ҚҰРЫЛЫС И С» жауапкершілігі шектеулі серіктестігі атқаруда.
Көпқабатты тұрғын үйлердің шатыры – ғимараттың қауіпсіздігі мен ұзақ мерзімді пайдаланылуына тікелей әсер ететін маңызды бөліктердің бірі. Әсіресе жауын-шашын кезінде шатырдың сапалы әрі талапқа сай болуы тұрғындардың тұрмысына қолайсыздық туындамауы үшін аса маңызды. Сондықтан мұндай жөндеу жұмыстары тұрғын үй қорын күтіп ұстауға және ғимараттардың техникалық жағдайын жақсартуға мүмкіндік береді.
Жұмыс барысын бақылай отырып, аудан әкімі мердігер мекеме өкіліне жөндеу жұмыстарын белгіленген мерзімде әрі сапалы аяқтауды тапсырды. Сонымен қатар жұмысты ауа райының қолайсыз кезеңіне қалдырмай, құрылыс талаптарын сақтай отырып жүргізудің маңыздылығын атап өтті.
Бұдан бөлек, жауапты сала басшыларына құрылыс жұмыстарының сапасын тұрақты бақылауда ұстау, қолданылатын материалдардың талаптарға сәйкестігін қадағалау және атқарылған жұмыстардың сапалы орындалуын қамтамасыз ету міндеттелді. Өйткені тұрғын үйлерді жөндеудегі басты талап – жұмысты уақытылы аяқтаумен қатар, оның нәтижесінің ұзақ мерзімге жарамды болуын қамтамасыз ету.
Аталған үйлердің тұрғындары да соңғы уақытта өз аулаларында қолға алынған оң өзгерістерге ризашылықтарын білдіруде. Бұған дейін аулаларға асфальт төселіп, жаяу жүргіншілерге арналған жолдар салынған. Енді тұрғын үйлердің шатырларын жөндеу жұмыстарының басталуы – көпқабатты үйлердің жағдайын кешенді түрде жақсартуға бағытталған маңызды қадам.
Тұрғындардың айтуынша, аулалардың абаттандырылуы мен ортақ аумақтардың ретке келтірілуі күнделікті тұрмысты жеңілдетіп, қоршаған ортаның көркін арттыруға ықпал етеді. Ал шатырларды жөндеу тұрғын үйлерді күтіп ұстауға және алдағы уақытта туындауы мүмкін мәселелердің алдын алуға мүмкіндік береді. Осыған орай олар аудан көлемінде атқарылып жатқан жұмыстарға қолдау білдіріп, жауапты мекемелерге алғыстарын жеткізді.
Айта кетейік, бұған дейін Әйтеке би кентіндегі Желтоқсан және В. Счастнов көшелерінің бойында орналасқан көпқабатты тұрғын үйлердің аулаларын абаттандыру жұмыстары жүргізілген болатын. Атап айтқанда, тұрғындарға қолайлы жағдай жасау мақсатында аулаларға асфальт төселіп, автотұрақтар мен жаяу жүргіншілер жолдары салынды. Бұл жұмыстар тұрғын үй маңындағы аумақтарды ретке келтіріп, көлік қозғалысы мен жаяу жүргіншілердің жүріп-тұруына қолайлы жағдай жасауға бағытталды.
Аудан әкімі Алмасбек Есмаханов тұрғындардың өмір сүру сапасын арттыру, елді мекендердің инфрақұрылымын дамыту және тұрғын үй қорын күтіп ұстау жергілікті атқарушы орган жұмысының басым бағыттарының бірі екенін атап өтті.
Сондай-ақ аудан орталығындағы көпқабатты тұрғын үйлердің шатырларын жөндеу және жаңарту жұмыстарын алдағы уақытта да кезең-кезеңімен жалғастыру қажеттігіне назар аударды. Бұл ретте жұмыстардың сапалы орындалуы мен тұрғындардың қауіпсіздігі басты назарда болуы тиіс.
Жалпы, Қазалы ауданында тұрғын үй қорын жаңғырту, аулаларды абаттандыру және инфрақұрылымды жақсарту бағытындағы жұмыстар тұрғындарға қолайлы орта қалыптастыруға бағытталған. Мұндай бастамалардың жүйелі жүзеге асуы ауданның көркеюіне, тұрғындардың тұрмыс жағдайының жақсаруына және елді мекендердің заманауи талаптарға сай дамуына жол ашады.
