Мәжілісте алдағы жылыту маусымына дайындық жұмыстары жан-жақты қаралып, тұрғындар мен әлеуметтік нысандарды қысқы кезеңде үздіксіз жылумен қамтамасыз ету бойынша нақты міндеттер айқындалды.
Өткен жылу беру маусымына аудан бойынша 17 мың тонна қатты отын қажеттілігі жоспарланған. Алайда, тұрғын үйлердің көгілдір отынға көптеп көшуіне байланысты 14,2 тонна қатты отын жеткізілді. Алдағы жылу беру маусымына 11 мың тонна қатты отын және
1,9 мың тонна сұйық отын қажеттілігі жоспарланып отыр.
Аудан әкімі жиында аймақ басшысы Мұрат Нәлқожаұлының тапсырмаларына сәйкес барлық жауапты мекемелерге жылу беру маусымына дайындықты күшейтуді тапсырды. Әсіресе білім беру, денсаулық сақтау, мәдениет, спорт және өзге де әлеуметтік нысандардағы қазандықтар, инженерлік желілер мен жылу жүйелерінің толық дайын болуы қажеттігін атап өтті.
Күн тәртібіндегі негізгі мәселе бойынша аудандық тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы Жасұлан Сыдықов баяндама жасады. Баяндама барысында қатты және сұйық отын қорын жасақтау, коммуналдық инфрақұрылымның дайындығы, табиғи газға көшу жұмыстары және аудан орталығындағы проблемалық нысандардың жағдайы талқыланды.
Жиында аудан басшысы өткен жылы аудан орталығындағы ескі жатақханалардағы жылу жүйелерінде ақаулар тіркелгенін және «Мелиоратор» шағын ауданындағы көпқабатты тұрғын үйлердің жылуына қатысты мәселелер туындағанын айтып, биыл мұндай мәселелерге жол бермеуді тапсырды.
Білім беру ұйымдарының дайындығы бойынша аудандық білім бөлімінің басшысы Әділхан Жөлекешов баяндады. Бұл ретте білім бөлімінің басшысына ағымдағы жөндеу жұмыстары жүргізіліп жатқан 6 мектептегі құрылыс жұмыстарын жаңа оқу жылы басталғанға дейін толық аяқтау қажеттігі ескертілді.
Денсаулық сақтау саласы бойынша аудандық ауруханаға қарасты мекемелердің дайындығы, сонымен қатар мәдениет және спорт нысандарының қысқы кезеңге әзірлігі талқыланып, Майдакөл ауылындағы жаңа клуб ғимаратының құжаттарын рәсімдеу мәселесі көтерілді. Аудан әкімі аталған нысандардың құжаттарын 1 тамызға дейін толық аяқтауды тапсырды.
Жиын барысында қатты отын тасымалдауда вагон тапшылығын болдырмау, көмір бағасын тұрақтандыру және жеткізушілермен меморандум жасау мәселелері де талқыланды.
Мәжіліс қорытындысында аудан әкімі барлық жоспарланған жөндеу жұмыстарын 2026 жылдың 1 қыркүйегіне дейін толық аяқтауды, анықталған кемшіліктерді жедел түрде жоюды және әлеуметтік нысандардың 2026–2027 жылдардағы жылу беру маусымына 100 пайыз дайын болуын қамтамасыз етуді қатаң тапсырды.
