Бас қосудың негізгі мақсаты – әкенің отбасындағы жауапкершілігін айқындау, ұрпақ тәрбиесіндегі орнын нығайту және қоғамда әкелік өнегені кеңінен насихаттау. Жиынға арнайы қатысқан «Әкелер одағы» республикалық қоғамдық бірлестігінің Қызылорда облыстық филиалының төрағасы, облыстық мәслихаттың VIII шақырылым депутаты Ержан Ескендір мен бірлестіктің облыстық филиалы төрағасының орынбасары, Қызылорда қалалық филиалының төрағасы Болатбек Айтбенбетов әкелер кеңесінің жұмысын жандандыру, отбасылық құндылықтарды сақтау және бала тәрбиесіне қоғам болып атсалысу мәселелеріне назар аударды.
Кездесу барысында әкенің қоғамдағы орны, отбасындағы жауапкершілігі, бала бойына адамгершілік қасиеттерді сіңірудегі ықпалы және жас ұрпаққа өнеге көрсетудің маңызы кеңінен талқыланды. Қатысушылар бала тәрбиесі тек білім беру ұйымдарының немесе ананың міндеті емес, бұл – ата-ананың ортақ жауапкершілігі екенін атап өтті. Әсіресе әкенің баласына сөзімен ғана емес, ісімен үлгі болуы, отбасында сыйластық пен жауапкершілік қағидаттарын қалыптастыруы маңызды екені айтылды.
«Әкелер одағы» республикалық қоғамдық бірлестігінің Қызылорда облыстық филиалының төрағасы Ержан Ескендір өз сөзінде әкенің бала өміріндегі орнына ерекше тоқталды. Оның айтуынша, ұрпақ тәрбиесінде әкелік жауапкершілікті арттыру, балаларға дұрыс бағыт-бағдар беру және олардың бойында ұлттық құндылықтарға деген құрметті қалыптастыру – қоғам алдындағы маңызды міндеттердің бірі. Әкенің өнегесі мен отбасындағы тәрбиесі баланың тұлға болып қалыптасуына, өмірлік ұстанымдары мен мінез-құлқына тікелей ықпал етеді.
Ал №276 орта мектеп директорының тәрбие ісі жөніндегі орынбасары, облыстық Әкелер кеңесінің мүшесі Нұрсұлтан Құламетов әке өнегесін насихаттау, жас буынға бағыт-бағдар беру және мектеп пен отбасы арасындағы байланысты нығайту мәселелерін қозғады. Ол бала тәрбиесінде ата-аналар мен педагогтердің өзара түсіністігі мен бірлескен жұмысы маңызды екенін атап өтті. Сонымен қатар әкелердің мектеп өміріне белсенді араласуы балалардың тәртібі мен тәрбиесіне оң ықпал ететінін жеткізді.
Өз кезегінде М.Матаев атындағы №170 мектеп-гимназияның ата-аналар комитетінің төрағасы Жеңісбек Аралбаев бала тәрбиесіндегі ата-аналардың белсенділігіне тоқталды. Оның сөзінше, баланың бойына жақсы қасиеттерді сіңіру үшін отбасындағы тәрбие мен ата-ананың жеке үлгісі ерекше маңызға ие. Сондықтан әкелердің бала тәрбиесіне жауапкершілікпен қарап, олардың өміріне белсенді араласуы – келешек ұрпақтың қалыптасуына ықпал ететін негізгі факторлардың бірі.
Басқосу барысында Әкелер кеңесінің алдағы жұмыстары, отбасы институтын нығайту, жасөспірімдер арасындағы тәрбие мәселелерінің алдын алу және ұлттық құндылықтарды дәріптеу бағытында бірлескен іс-шаралар ұйымдастыру жөнінде де пікір алмасты. Мұндай кездесулердің әкелер арасындағы тәжірибе алмасуға, өзекті мәселелерді ортақ талқылауға және тәрбие жұмысын жүйелі жүргізуге мүмкіндік беретіні айтылды.
Жиынның маңызды сәттерінің бірі – Қазалы аудандық Әкелер кеңесінің төрағасын сайлау болды. Қатысушылардың қолдауымен Е. Бозғұлов атындағы №249 мектеп-лицейдің директоры Батырбек Тәңірбергенов аудандық Әкелер кеңесінің төрағасы болып сайланды. Бұл шешім алдағы уақытта ауданда әкелер кеңесінің жұмысын үйлестіруге, отбасы мен білім беру ұйымдары арасындағы байланысты нығайтуға және әкелердің қоғамдық өмірге белсенді араласуына ықпал етеді деп күтіледі.
Тағылымы мол басқосу еңбек ардагері, Қазақстан Жазушылар одағының мүшесі, Қазалы ауданының құрметті азаматы Қасқырбек Мәмбетжанның ақ батасымен қорытындыланды.
Отбасы – қоғамның тірегі, ал әке – шаңырақтың берекесі мен ұрпақ тәрбиесіндегі маңызды тұлға. Сондықтан әкелік жауапкершілікті арттыру, ұлттық тәрбие мен отбасылық құндылықтарды дәріптеу бағытындағы мұндай бастамалардың маңызы зор.
