Жыл сайын дәстүрлі түрде ұйымдастырылатын шараға облыстың барлық аудандарынан келген вокалды-аспапты ансамбльдер қатысты.
Мерекелік кешке аудан әкімі Алмасбек Есмаханов қатысып, көпшілікті Қызылорда қаласының астана болғанына 100 жыл толуымен құттықтап, фестивальге қатысушыларға сәттілік тіледі.
— «Жыл сайын дәстүрлі түрде өтетін бұл фестиваль ұлттық өнерді, жергілікті дарындарды қолдаудың алаңына айналды. Бүгінгі шара аудандар арасындағы мәдени-рухани байланысты арттырып, ұлт руханиятына зор үлес қосады деп сенемін.
Мәдениет көгіндегі темірқазықтай жұлдыздарымыз, Халық қаһарманы Роза Бағланова, жезтаңдай әнші Мәдина Ералиева, дарынды композитор Кеңес Дүйсекеевті, шығыстың жарық жұлдызы Ғани Мұратбаевты дүниеге әкелген қасиетті Қазалы жеріне қош келдіңіздер! Айтулы өнер кешінде баршаңызға сәттілік тілеймін!» — деді аудан басшысы.
Фестиваль барысында Қызылорда қаласынан «Мереке», Жаңақорған ауданынан «К-4», Жалағаш ауданынан «Алтын Арай», Сырдария ауданынан «Ритм», «Dostar band», Арал ауданынан «Арал», Шиелі ауданынан «Шиелі» және Қазалы ауданынан «Қазалы», «5-аймақ» вокалды-аспапты ансамбльдері 70-90 жылдардағы ескі әндер мен өздерінің шығармашылық туындыларын орындап, көпшіліктің ықыласына бөленді.
Фестивальге қатысқан барлық вокалды-аспапты ансамбльдер аудан әкімінің “Алғыс хатымен” және қаржылай сертификаттармен марапатталып, көңілді кеш жарқын отшашуға жалғасты.
