Үстіміздегі жылдың 8 ай қорытындысымен Қызылорда облысы бойынша жалпы вирусты гепатит ауруының 46 жағдайы тіркелді, оның басым көпшілігі, яғни 76 пайызы «А» вирусты гепатитінің үлесінде.
Өткен жылдың осы кезеңімен салыстырғанда вирустың дәл осы түрі бойынша аурушаңдық көрсеткіші 3,5 есеге төмендеген.
Жедел «А» вирусты гепатитіне шалдыққан науқастардың 51% — 14 жасқа дейінгі балалар, салыстырмалы түрде балалар арасындағы сырқаттанушылық та 4 есеге азайды.
Қызылорда облысының санитариялық-эпидемиологиялық бақылау департаменті ауруды жұқтырып алу қаупін төмендету үшін келесідей сақтық шараларын ұсынады:
— тамақ ішу алдында, дәретханаға барғаннан кейін, жұмыстан, серуеннен қайтып оралған кезде қолды сабындап жуу;
— ашық су айдындарынан қайнамаған суды ішпеу және онымен жемістер мен көкөністерді жумау;
— белгіленбеген су айдындарында шомылмау;
— үйде, жұмыста, қоғамдық тамақтану объектілерінде, сауда, коммуналдық, өнеркәсіптік үй-жайларда тазалықты сақтау.
«А» және «В» гепатиттерінің алдын алудың тиімді жолы – вакцинация. «А» түріне қарсы екпе 2 жастағы балаларға және «А» вирустық гепатиті ошақтарында қарым-қатынаста болған 14 жасқа дейінгі балаларға науқаспен байланыста болған алғашқы 2 аптада жүргізіледі. Вакцинация 2 рет 6 айлық интервалмен салынады.
«В» вирустық гепатитіне қарсы вакцинация 3 егуден тұрады, бала оларды 1 жасына дейін алады. Алғашқы доза туған кезде бірден енгізіледі. Келесі кезеңдік вакцина 2 және 4 айлық кезінде жүргізіледі.
Әлия Әбдіқайымова
Қызылорда облысының СЭБД басшы орынбасары
