Мерекелік жиында аудан әкімі Алмасбек Есмаханов қазыналы қарттар мен ақ жаулықты аналарға Президенттің, аймақ басшысының құттықтауы мен ізгі лебізін жеткізді.
-Бүгінгі күн – еліміздің өсіп-өркендеуіне өлшеусіз үлес қосқан, жүрегінде ел мен жерге деген адалдықтың оты мәңгі сөнбеген қазыналы қарттарымыздың мерейлі мерекесі. «Қариясы бар елдің қазынасы бар», – дейді дана халқымыз. Абыз ақсақалдарымызды құрметтеп, асыл аналарымызды ардақтау – біздің қастерлі парызымыз. Жыл сайын аймақ басшысының қолдауымен қазыналы қарияларды жан-жақты әлеуметтік қолдау, медициналық қызмет көрсету сапасын арттыру бағытында өңірімізде ауқымды жұмыстар атқарылуда. Бұл мақсатта бюджеттен бөлінетін қаржы көлемі де артып келеді. Соңғы үш жылда жылына бір рет төленетін әлеуметтік көмектің көлемі Ұлы Отан соғысының ардагерлеріне 1,5 млн. теңгеден 5 млн. теңгеге, оларға теңестірілген ардагерлер мен тыл ардагеріне 90 мыңнан 196 мың теңгеге ұлғайды. Биыл ауданымызда 260 ардагерге барлығы 56 млн. теңге көлемінде бір реттік әлеуметтік көмек көрсетілді. Аудан бойынша жыл сайын 100-ден аса егде жастағы азаматтар шипажай қызметіне ұқсас арнаулы әлеуметтік қызметтермен қамтылуда. Асыл қазыналарымызды әлеуметтік қолдау бағытындағы кешенді жұмыстарымыз алдағы уақытта да жалғаса беретін болады.
Мерейлі мерекеде баршаңыздың дендеріңізге саулық, отбасыларыңызға амандық, бақ-береке тілеймін, — деді аудан басшысы.
Мерекелік жиында бүгінгі жас ұрпаққа үлкен өнеге көрсетіп, түрлі қоғамдық жұмыстарға белсене араласып, елдің берекесі мен бірлігін нығайтуға үлес қосып жүрген ардагерлерге Қазалы ауданының және облыстық, аудандық ардагерлер кеңесі төрағаларының «Құрмет грамотасы» мен «Алғыс хаттары», «Қызылорда облысының құрметті ардагері» төсбелгілері табысталды.
Шарада аудандық ардагерлер кеңесінің төрағасы Оразғали Бекбанов және бірқатар ақсақалдар мен ақ жаулықты аналар сөз сөйлеп, жылы лебіздерін білдірді.
Қазыналы қариялардың мерейін үстем еткен шарада аудан өнерпаздары ән-күйден шашу шашып, ардагерлерге аудан басшысының арнайы мерекелік сыйлықтары табысталды.
Шара соңында еңбек ардагері Дәуіт Сайын барша ардагерлерді мерекемен құттықтап, ақ батасын берді.
