Алдымен аудан басшысы «Қожабақы – Бекарыстан би» аудандық маңызы бар автомобиль жолының 25-шақырымында орналасқан темірбетон көпірді қайта жаңғырту жұмыстарымен танысты.
1976 жылы пайдалануға берілген бұл көпірге осы уақытқа дейін күрделі жөндеу жүргізілмеген. Арада жарты ғасырға жуық уақыт өткендіктен, көпірдің тіреу конструкциялары мен плиталары әбден тозып, кейбір бөліктері бүлінген. Сондықтан өткелді қайта жаңғырту қажеттілігі күн тәртібінде тұрған өзекті мәселелердің бірі болатын.
Аталған көпірдің маңызы ерекше. Себебі ол Қожабақы, Жалпақ және Бекарыстан би елді мекендерінің тұрғындары үшін аудан орталығымен қатынасты қамтамасыз ететін маңызды көлік өткелі саналады. Әсіресе Сырдария өзеніндегі су деңгейі көтеріліп, қалқымалы көпірлер алынатын кезеңде бұл өткелдің маңызы арта түседі. Осыған байланысты тұрғындар тарапынан көпірді жөндеу мәселесі бірнеше рет көтеріліп, оны қайта жаңғырту қажеттігі айтылып келген еді.
Биыл аймақ басшысы Мұрат Ергешбаевтың қолдауымен аталған нысанды қайта жаңғыртуға қажетті қаржы бөлініп, мердігер мекеме – «Гүлнұр МК» ЖШС құрылыс жұмыстарын бастап кетті. Қазіргі таңда ескі көпірдің тозығы жеткен бөліктерін алып тастау, сондай-ақ құрылыс кезеңінде тұрғындардың қатынасын қамтамасыз ету мақсатында канал арқылы уақытша өткел салу жұмыстары жүргізілуде.
Нысанды аралау барысында аудан әкімі мердігер мекеме өкіліне құрылыс сапасына баса мән беруді тапсырды. Сонымен қатар ауа райының қолайлы кезеңін тиімді пайдаланып, күн райы қатты суытқанға дейін құрылыс жұмыстарын барынша ілгерілету қажеттігін атап өтті.
Бұдан кейін Алмасбек Есмаханов Қожабақы ауылы маңындағы «Қазалы–Қожабақы–Бозкөл–Кәукей» автомобиль жолының 32,1-шақырымында орналасқан темірбетон көпірдің қайта жаңғырту жұмыстарын көрді.
Жаңадан салынып жатқан көпірдің ұзындығы 21,6 метрді, ал жүру бөлігінің ені 7 метрді құрайды. Қазіргі таңда құрылыс жұмыстарының 90 пайызы аяқталған. Негізгі жұмыстардың басым бөлігі орындалып, нысанды пайдалануға беруге дайындық кезеңі басталған.
Бүгінде көпірдің жүру бөлігіне және кіреберіс аумақтарына асфальт төсеу жұмыстарына әзірлік жүргізілуде. Сонымен бірге көпірдің екі жағындағы қауіпсіздік қоршауларын орнату жұмыстары атқарылуда. Құрылыс толық аяқталғаннан кейін бұл бағыттағы көлік қозғалысы едәуір жеңілдеп, жол қауіпсіздігі де арта түспек.
Аудан әкімі нысандағы жұмыс барысын бағамдап, қалған жұмыстарды белгіленген мерзімде әрі құрылыс талаптарына сәйкес аяқтаудың маңыздылығын ескертті.
Сондай-ақ аудан басшысы Сырдария өзені арқылы өтетін Қарлан көпірінің құрылыс алаңына барып, негізгі конструкциялық элементтерді орнату және монтаждау жұмыстарының барысымен танысты.
Қарлан көпірінің құрылысы – ауданның жол қатынасын жақсартуға бағытталған маңызды жобалардың бірі. Қазіргі таңда нысан аумағында ауқымды құрылыс жұмыстары жүргізілуде. Атап айтқанда, көпірдің 84 қаданы қағу жұмыстары толығымен аяқталып, сегіз тіреудің барлығы орнатылған. Ендігі кезекте көпірдің негізгі аралық құрылымдарын монтаждау жұмыстары жалғасуда.
Сонымен қатар көпірдің бір бөлігін асфальттау жұмыстары аяқталған. Ал екінші бөлігінде асфальт төсеуге дайындық ретінде қиыршық тас төсеу жұмыстары жүргізілуде. Құрылыс алаңында жұмыс қарқынын арттыру мақсатында 30 арнайы техника мен 80 жұмысшы жұмылдырылған. Нысанның бас мердігері – «Нұрлы Тау ЛТД» ЖШС.
Аудан әкімі құрылыс алаңындағы жұмыстарды көзбен көріп, жауапты сала басшылары мен мердігер мекеме өкілдеріне бірқатар нақты тапсырма берді. Атап айтқанда, құрылыс қарқынын бәсеңдетпей, жұмыс күшін тиімді пайдалану, сапа талаптарын қатаң сақтау және белгіленген мерзімде аяқтауға күш салу қажеттігін айтты. Сондай-ақ құрылыс барысында қауіпсіздік талаптарының сақталуы да назардан тыс қалмауы тиіс екенін жеткізді.
Жалпы, аудан аумағында қайта жаңғыртылып жатқан үш көпірдің де әлеуметтік-экономикалық маңызы зор. Өйткені жол қатынасының қолжетімділігі – елді мекендердің дамуына, тұрғындардың тұрмыс сапасының артуына тікелей әсер ететін негізгі факторлардың бірі. Көпірлердің жаңаруы ауылдар арасындағы көлік қозғалысын жеңілдетіп қана қоймай, тұрғындардың аудан орталығына қатынауына, жедел жәрдем, төтенше жағдайлар және басқа да қызметтердің кедергісіз жетуіне мүмкіндік береді.
Сонымен қатар сапалы салынған көпірлер жол-көлік қауіпсіздігін арттырып, өңірдегі инфрақұрылымның жаңаруына серпін береді. Бұл – ең алдымен, ауыл тұрғындары үшін жасалып жатқан маңызды жағдайлардың бірі.
Аудан басшысы әрбір нысанның сапалы әрі уақытылы аяқталуы басты назарда болатынын атап өтіп, жауапты сала басшыларына құрылыс жұмыстарының барысын тұрақты бақылауда ұстауды тапсырды. Ал мердігер мекемелерге белгіленген талаптарды қатаң сақтап, тұрғындар үшін маңызды жобаларды сапалы жүзеге асыру міндеттелді.
