Пак Велорий Викторович — еліміздің спорт саласына өлшеусіз еңбек сіңірген білікті маман. Оның шәкірттері бүгінде әлемдік аренада ел намысын қорғап, жоғары жетістіктерге қол жеткізуде. Олардың қатарында Алмас Өтешов, Илья Ильин, Қуаныш Рахатов, Шин Олег, Роман Русиновский және Александр Зайчиков сынды танымал спортшылар бар. Сонымен қатар, жаттықтырушы 60-тан астам спорт шеберін, 12 халықаралық дәрежедегі спорт шеберін және 3 Қазақстан Республикасының еңбек сіңірген спорт шеберін тәрбиелеп шығарған.
Биыл тұңғыш рет өткізіліп отырған бұл республикалық додаға еліміздің барлық өңірінен 10 команда қатысып, 100-ге жуық зілтемірші 8 түрлі салмақ дәрежесі бойынша сынға түседі. Жарысқа ерлер де, әйелдер де қатысуда.
Ашылу салтанатына Қызылорда облысы әкімінің орынбасары Мейрамбек Шермағанбет, құрметті жаттықтырушы Пак Велорий және облыстық ауыр атлетика федерациясының президенті Темірхан Бердәліұлы қатысып, спортшыларға сәттілік тіледі.
— Киелі Сыр елінің тумасы, облысымыздың құрметті жаттықтырушысы Пак Велорий Викторович — талай жылдар бойы еліміздің спортына адал еңбек етіп, ауыр атлетика саласының дамуына өлшеусіз үлес қосқан біртуар азамат. Даңқты спортшыларды тәрбиелеген дара тұлғаның жүлдесіне арналған бүгінгі турнирдің маңызы да ерекше. Себебі әр аймақтан жиналған мықты зілтемішілер жарыс алаңында өз мүмкіндіктерін көрсетіп, жеңіске деген жігерін танытады. Осы орайда, барлық спортшыларға сәттілік тілей отырып, дүбірлі додада шын мықты жеңіске жетсін деп тілек білдіремін, — деді Мейрамбек Зинабдинұлы.
Салтанатты шара барысында Мейрамбек Шермағанбет аймақ басшысы Нұрлыбек Нәлібаевтың атынан құрметті жаттықтырушыға Алғыс хат табыстап, қазақы дәстүрмен сый-құрмет көрсетті.
Өз сөзінде Велорий Викторович турнирді ұйымдастыруға қолдау көрсеткен облыс басшылығына, спорт жанашырларына және барлық қатысушыларға алғыс білдірді.
Сонымен бірге, облыстық ауыр атлетика федерациясының президенті Темірхан Бердәліұлы да құттықтау сөз сөйлеп, үздік бапкерге ерекше құрмет көрсетті.
Айта кету керек, облыс әкімінің қолдауымен алғаш рет өткізіліп отырған бұл турнир биылдан бастап халықаралық күнтізбелік жоспарға енгізілді. Алдағы уақытта аталмыш жарыс жыл сайын дәстүрлі түрде халықаралық деңгейде өткізілетін болады.
Жарыс жеңімпаздары арнайы медальдармен және қомақты сыйақылармен марапатталады. Турнир 13 тамызға дейін жалғасады.
