Қызылордада жұқпалы аурулармен күресуге тиісті медицина қызметкерлері 6 айдан бері шенеуніктермен алысып келеді. Биылғы жылдан бастап зиянды жерде жұмыс істейтіндерге заң жүзінде 55 жастан зейнетке шығуға болатындығы жарияланған еді. Осы бұйрыққа сәйкес Қызылорда облыстық фтизиопульмонология орталығының 50-ден астам жұмысшылары зейнетке шығуға құжат тапсырған. Алайда олардың құжаттары қараусыз қалыпты. Себебі орталықтың басшылығы соңғы 10 жылдан бері ұжымның міндетті кәсіптік зейнетақы жарнасын төлемей келіпті, деп хабарлайды postskript.kz Ақпараттық агенттігі.
ҚР Еңбек және халықты әлеуметтік қорғау министрінің 2023 жылдағы 25 желтоқсанындағы №521 бұйрығына сәйкес зиянды жерлерде жұмыс жасайтын жандарға 55 жастан зейнетке шығуға болады делінген заңға қол қойылған. Осыны естіген туберкулезге қарсы орталықтың медициналық қызметкерлері бөріктерін аспанға атып, құжаттарын дайындай бастаған. Алайда құжат рәсімдеуді басталмай жатып біршама қиындықтарға тап болыпты.
Зейнетке шығатындарын болса 55 жастан рұқсат деді. Сонымен барлығымыз документтерді өткізгенде глав врачымыз қайта жиналыс жасап, жоқ сіздердің 5 пайыздарыңыз 2014 жылдан 2024 жылға дейін мүлдем төленбеген. Сол себепті сіздер шыға алмайтын болдыңыздар
– деді АЛМАГҮЛ ИСАБЕКОВА, ҚЫЗЫЛОРДА ОБЛЫСТЫҚ ФТИЗИОПУЛЬМОНОЛОГИЯ ОРТАЛЫҒЫНЫҢ МЕЙІРБИКЕСІ.
Медициналық орталық қызметкерлерінің айтып отырған 5 пайызы ол — міндетті кәсіптік зейнетақы жарнасы. Оны мекеменің әкімшілігі, яғни жұмыс беруші төлеуге міндетті екен. Алайда жаңадан келген бас дәрігер мен оның әкімшілігі бюджетте ақша жоқ деп дөп қайырыпты.
Біз денсаулық сақтау басқармасына өзіміздің бюджеттік өтінім дейміз, ұсыныстарымызды басында дәлелді құжаттарымызбен, қызметтеркелредің суммасын есептеп бердік. Әрі қарай жұмыс жасалып денсаулық сақтау басқармасы экономикалық басқармаға өткізген шығар. Бірақ сессиядан қолдау таппады.
– деді ЕРБОЛ МОЛДАШЕВ, ҚЫЗЫЛОРДА ОБЛЫСТЫҚ ФТИЗИОПУЛЬМОНОЛОГИЯ ОРТАЛЫҒЫ БАС ДӘРІГЕРІНІҢ ОРЫНБАСАРЫ.
Уақытылы төлем жасамаған үшін кірістер басқармасы туберкулезге қарсы орталыққа 6,5 миллион теңге айыппұл салыпты. Мекеменің ақ халаттыларға жарнаға төлеуі тиісті қарызы болса 635 миллионды құрап отыр. Жұмыс берушілер өз қызметкерлеріне мұндай қаржыны қайдан тауып беретіндерін болса білмей дал. Ендігіде мұны тек сот шешуі мүмкін дейді.
