Абаттандыру және тазалық жұмыстары цифрлық бақылаумен күшейтілуде

Аралау барысында көпқабатты тұрғын үйлердің аулаларын абаттандыру, санитарлық тазалықты сақтау, қоғамдық орындардың жай-күйі, жасыл желектерді күтіп-баптау, балалар ойын алаңдарының жағдайы, жаяу жүргіншілер аймақтарының тазалығы және тұрғындарға қолайлы қоғамдық кеңістік қалыптастыру бағытындағы жұмыстар жан-жақты қаралды.
Қала әкімі жауапты сала басшылары мен мердігер мекемелерге тазалық пен тәртіпті қамтамасыз ету жұмыстарын күшейтуді тапсырды. Әсіресе, тұрғын үйлердің аулаларын қоқыстан толық тазарту, көгалдандыру жұмыстарын жандандыру, жасыл аймақтарды күтіп ұстау, санитарлық талаптарды сақтау және ортақ пайдаланылатын аумақтардың тазалығын тұрақты бақылауда ұстау қажеттігін атап өтті.
Сонымен қатар қаладағы абаттандыру жұмыстарының тиімділігін арттыруда цифрлық технологиялардың мүмкіндіктерін кеңінен пайдалану қажеттігі де айтылды. Қазіргі таңда коммуналдық қызметтердің жұмысын жүйелеу, атқарылған жұмыстарды фотоесеп арқылы тіркеу, геоақпараттық жүйелерді пайдалану және тұрғындардың өтініштері мен ұсыныстарын электронды платформалар арқылы жедел қабылдау бағытындағы цифрландыру шаралары кезең-кезеңімен жүзеге асырылуда. Бұл өз кезегінде атқарылған жұмыстардың ашықтығын қамтамасыз етіп, жауапты мекемелердің жұмысын жедел үйлестіруге мүмкіндік береді.
Нұржан Сәбитұлы тұрғындардың ұсыныс-пікірлері мен өтініштерін ескерудің маңыздылығына ерекше тоқталып, әрбір көтерілген мәселе уақытылы қаралып, нақты шешім қабылдануы тиіс екенін жеткізді. Оның айтуынша, қала тазалығы мен тұрғындарға жайлы орта қалыптастыру – тек коммуналдық қызметтердің ғана емес, қоғамның ортақ жауапкершілігі.
Айта кету керек, қалада абаттандыру және санитарлық тазалық жұмыстарын цифрландыру, коммуналдық қызметтердің тиімділігін арттыру және қоғамдық кеңістіктердің сапасын жақсарту бағытындағы кешенді жұмыстар алдағы уақытта да жалғасып, тұрғындардың өмір сүру сапасын арттыруға басымдық берілетін болады.