Мерекелік жиынға аудан әкімінің орынбасары Нариман Жахудаев, аудан прокуроры Бақытхан Бөлеулиев, аудандық полиция бөлімінің бастығы Асылбай Аңсатов, құқық қорғау органдарының қызметкерлері мен ардагерлері қатысты.
Іс-шараның ашылуында аудан әкімінің орынбасары Нариман Үсенұлы сөз сөйлеп, аудан әкімі Мажит Самитовтың құттықтауын жеткізді.
Мереке аясында қызметтік міндеттерін адал атқарып, жоғары кәсіби біліктілігімен ерекшеленген бірқатар полиция қызметкерлері марапат төрінен көрінді. Атап айтқанда, Қазақстан Республикасы Ұлттық қауіпсіздік комитеті Шекара қызметінің Қызылорда облысы бойынша департаментінің Құрмет грамоталары мен аудан әкімінің Алғыс хаттары табысталды.
Сонымен қатар аудан прокуроры Бақытхан Бөлеулиев тәртіп сақшыларын кәсіби мерекелерімен құттықтап, құқық қорғау саласының дамуына қосқан үлесі үшін бірқатар қызметкерлерді марапаттады.
Өз кезегінде аудандық полиция бөлімінің бастығы Асылбай Ансатов әріптестеріне ізгі тілегін білдіріп, Қызылорда облысы Полиция департаментінің Грамоталары мен Алғыс хаттарын, сондай-ақ аудандық полиция бөлімінің марапаттарын табыстады.
Мерекелік кеш аудан өнерпаздары мен полиция бөлімінің қызметкерлері дайындаған концерттік бағдарламамен жалғасып, қатысушыларға көтеріңкі көңіл күй сыйлады.
