Жұмыс сапары барысында шаһар басшысы орталықтағы қазандықтардың техникалық жағдайын, инженерлік желілердің жұмыс режимін, жөндеу науқанының орындалу барысын және негізгі жабдықтардың тұрақтылығын бақылады. Сондай-ақ жауапты сала мамандары жылу-электр орталығының өндірістік қуаты, жабдықтардың жүктемесі, жаңғырту жұмыстары мен алдағы жылыту маусымына әзірлік деңгейі туралы жан-жақты баяндама жасады.
Қазіргі таңда нысанда жоспарлы жөндеу жұмыстары бекітілген кестеге сәйкес жүргізілуде. Қазандықтар мен жылу желілерінің сенімді жұмысын қамтамасыз ету, ықтимал ақаулардың алдын алу және тұрғындарды үздіксіз жылумен қамту мақсатында барлық техникалық талаптар кезең-кезеңімен орындалуда.
Аралау барысында қала әкімі дайындық жұмыстарын сапалы әрі мерзімінде аяқтаудың маңыздылығына тоқталды.
«Жылыту маусымына сақадай сай болуымыз қажет. Дайындық жұмыстарын бәсеңдетуге болмайды. Қазірден бастап әлеуметтік нысандардың әзірлік паспорттарын тексеру керек», – деді Нұржан Сәбитұлы.
Сонымен қатар қала басшысы білім беру, денсаулық сақтау және өзге де әлеуметтік маңызы бар мекемелердің қысқы кезеңге толық дайын болуы басты міндет екенін атап өтті. Осы бағытта жауапты мекемелерге нақты тапсырмалар беріліп, барлық жұмыстардың орындалуы тұрақты бақылауда болатынын жеткізді.
Бүгінде жылыту маусымына дайындық үдерісінде цифрландыру жүйесінің мүмкіндіктері де кеңінен пайдаланылуда. Инженерлік желілердің техникалық жай-күйі, жөндеу жұмыстарының орындалу кезеңдері және жабдықтардың жұмыс көрсеткіштері цифрлық мониторинг арқылы қадағаланып, жедел басқару шешімдерін қабылдауға мүмкіндік беруде. Мұндай заманауи тәсілдер коммуналдық инфрақұрылымның сенімділігін арттырып, төтенше жағдайлардың алдын алуға ықпал етеді.
Жалпы Қызылорда қаласы бойынша жылыту маусымына дайындық қарқынды жүргізілуде. Бекітілген жоспарға сәйкес коммуналдық кәсіпорындар мен жауапты мекемелер тұрғындарды алдағы қыс мезгілінде сапалы әрі үздіксіз жылумен қамтамасыз ету бағытындағы жұмыстарды жүйелі түрде жалғастыруда.
