Облыстық байқауға Арал ауданынан №1 «Ақжелкен» мәдени-демалыс кешені, Қазалы ауданынан «Жібек жолы – Қазалы» мәдени-демалыс кешені, Жалағаш ауданынан «Самғау» мәдени-демалыс кешені, Сырдария ауданынан «Зерде» мәдени-демалыс кешені, Шиелі ауданынан «Шиелі шынарлары» мәдени-демалыс кешені және Жаңақорған ауданынан «Мәдениет қырандары» мәдени-демалыс кешені қатысты.
Байқаудың ашылу рәсімінде аудан әкімі Мажит Самитов сөз сөйлеп, Машбек Сапарбайұлының өнегелі өмір жолына және ұрпақ тәрбиесіндегі еңбегіне тоқталып, байқауға қатысушыларға сәттілік тіледі.
– Машбек Сапарбайұлы өзінің бар саналы ғұмырын туған жердің өсіп-өркендеуіне арнап, адал еңбектің, елжандылықтың жарқын үлгісін көрсете білген азаматтардың бірі.
Соғыс жылдарының ауыртпалығы, одан кейінгі елді қалпына келтіру кезеңі, ауыл шаруашылығын дамыту жолындағы ауқымды міндеттер – сол заман адамдарының иығына үлкен жауапкершілік жүктеді. Осындай сындарлы шақтарда Машбек Сапарбайұлы өзінің еңбекқорлығы мен ұйымдастырушылық қабілетін танытып, туған өлкесінің әлеуметтік-экономикалық дамуына, әсіресе ауыл шаруашылығы саласының өркендеуіне сүбелі үлес қосты.
Өмір бойы ұстанған адалдық, еңбекқорлық, елге қызмет ету қағидаларын өз балаларының бойына сіңіріп, ұрпағына дұрыс бағыт-бағдар бере білді. Бір әулеттен екі бірдей облыс әкімін тәрбиелеп өсірген әке ретінде оның бала тәрбиесіндегі ұстанымы, отбасылық құндылықтарға деген құрметі мен жауапкершілігі көпшілікке үлгі.
Еңбегімен елге сыйлы болған ардақты азамат Машбек Сапарбайұлының жарқын бейнесі ұрпақ жадында мәңгі сақтала берсін! Барша қатысушыларға сәттілік, шығармашылық шабыт тілеймін! Өнерлеріңіз өрге жүзсін! – деді аудан басшысы.
Байқау барысында қатысушы мәдени-демалыс кешендері Машбек Сапарбайұлының өмірі мен еңбек жолынан сахналық қойылымдар, музыкалық композициялар және жасанды интеллектің көмегімен бейнероликтер көрермен назарына ұсынып, жоғары шығармашылық деңгейлерін көрсетті.
Байқау қорытындысы бойынша бас жүлде Жаңақорған ауданының «Мәдениет қырандары» мәдени-демалыс кешеніне бұйырды. І орынға Арал ауданының №1 «Ақжелкен» мәдени-демалыс кешені, ІІ орынға Шиелі ауданының «Шиелі шынарлары» мәдени-демалыс кешені, ІІІ орынға Сырдария ауданының «Зерде» мәдени-демалыс кешені лайық деп танылды. Ал Қазалы ауданының «Жібек жолы – Қазалы» және Жалағаш ауданының «Самғау» мәдени-демалыс кешендері арнайы алғыс хаттармен және бағалы сыйлықтармен марапатталды.
