Аудан басшысы алдымен аудан орталығындағы орталық алаңнан бастап теміржол вокзалына дейін жалғасатын Әйтеке би көшесінің бойын жаяу аралап, ондағы әлеуметтік және кәсіпкерлік нысандарды, орталық базардағы сауда қатарларын көріп шықты. Әйтеке би кентінің әкімі мен кәсіпкерлік бөлімінің басшысына көше бойында орналасқан кәсіпкерлік нысандардың сыртқы келбетін қалыпқа келтіру, абаттандыру, санитарлық – тазалығын сақтау, түнгі жарықшамдарын ретке келтіру, базар маңындағы ретсіз орналасқан сауда қатарларын қалыпқа келтіру, орталық көшедегі жарықшам бағаналарын бояу мен бардерларды, ағаш түптерін әктеу, аяқ су арықтарын тазарту сынды бірқатар тапсырмалар жүктеді. Сондай-ақ Әйтеке би кентіне қатысты берілген әрбір тапсырманың сапалы әрі мерзімінде орындалуын тікелей өзі қадағалайтындығын жеткізді.
Алмасбек Әбілқасымұлы биыл аудан орталығында жөндеу жұмыстары жүргізілетін көшелерді де көріп шықты. Биыл Әйтеке би кенті бойынша жыл басынан бері 9 көшеге орташа және күрделі жөндеу жұмыстары жүргізіліп, оның бірқатары аяқталса, ал, жыл соңына дейін әлі де 7 көшеге жөндеу жұмыстарын жүргізу жоспарланып отыр. Аудан басшысы кент көшелерін аралау барысында келер жылға жөндеу жұмыстары жоспарланған Бәймішев, С.Аманов сынды көшелердің де жағдайымен танысты.
Аудан әкімі салаға жауапты орынбасары Мұрат Әбсұлтановқа аудан орталығына қатысты берілген әрбір тапсырманың тиянақты орындалуын қатаң бақылауда ұстауды ескертті.
