Отбасының берекесі мен бірлігін ұлықтап, кейінгі ұрпаққа өнеге көрсетіп жүрген әулеттің үлкені, «Батыр ана», тыл ардагері Үбіжарова Ұлмекен анамыз да сайлау учаскесіне барып, өзінің азаматтық таңдауын жасады. Ғибратты ғұмырымен ұрпағына үлгі болып отырған ардақты ана үшін елдің ертеңіне бейжай қарамай, сайлау арқылы өз пікірін білдіру – маңызды азаматтық міндет.
Бимұратовтар отбасының бұл қадамы – отбасылық құндылық пен азаматтық белсенділіктің өзара сабақтастығын көрсетеді. Әулет мүшелері елдің қоғамдық-саяси өміріндегі маңызды науқанға қатысу арқылы өз таңдауларын білдіріп, ел болашағына деген жауапкершілігін танытты.
Айта кетейік, «Мерейлі отбасы» ұлттық конкурсы – отбасы институтын нығайтуға, өнегелі отбасылардың озық тәжірибесін насихаттауға және қоғамдағы отбасы құндылықтарының маңызын арттыруға бағытталған жоба. Биыл облыстық кезеңде жүлделі орыннан көрінген Бимұратовтар отбасы да көпшілікке татулық пен тағылымның, үлкенге құрмет пен кішіге ізеттің үлгісін көрсетіп келеді.
Құрылтай сайлауына қатысу – әр азаматтың елдің қоғамдық өміріне араласуының маңызды тетігі. Осы ретте тағылымды әулеттің сайлау күні өз таңдауын жасауы – кейінгі ұрпаққа да азаматтық жауапкершіліктің жарқын үлгісі.
