Іс-шараға 400-ге жуық жазасын өтеуші қатысып, өздерінің құқықтары мен міндеттері жөніндегі білімдерін ортаға салды.
Аталған шараның негізгі мақсаты – жазасын өтеушілердің құқықтық сауаттылығын арттырумен қатар, оларды қоғамға қайта бейімдеуге және әлеуметтендіруге ықпал ету. Сондай-ақ жаза өтеу кезеңінде құқық бұзушылықтардың алдын алу, ішкі тәртіп талаптарын сақтау және тәрбиелік жұмыстарды күшейту көзделді.
Сайыс барысында қатысушылар өз міндеттерін қаншалықты білетінін көрсетіп, құқықтық бағыттағы сұрақтарға жауап берді. Мұндай іс-шаралар жазасын өтеушілердің заң талаптарын түсінуіне, жауапкершілігін сезінуіне және болашақта қоғамға бейімделуіне оң әсер етеді.
Шараға белсенді қатысып, ерекше көзге түскен жазасын өтеушілерге алғыс хаттар табысталып, естелік сыйлықтар берілді.
Құқықтық сауаттылықты арттыру және жазасын өтеушілерді қоғамға қайта бейімдеу бағытындағы жұмыстар алдағы уақытта да жалғасын табады. Қызылорда облысының прокуратурасы осындай тәрбиелік және құқықтық іс-шараларды тұрақты түрде ұйымдастыруды жоспарлап отыр.
