Турнирдің ашылу рәсіміне аудан әкімі Айтбай Жандарбеков қатысып, сала ардагерлері мен тәртіп сақшыларын кәсіби мерекемен құттықтады.
–“Сіздерді келе жатқан кәсіби төл мерекелеріңіз — Қазақстан полициясы күнімен шын жүректен құттықтаймын!
Ел тыныштығын сақтау жолында қиындықтан да, қатерден қаймықпайтын қоғамдық тәртіптің қырағы сақшылары — полицейлердің еңбегі әрдайымда құрмет пен алғысқа лайық.
«Ер қадірін білмеген — ел қадірін білмейді» дегендей, қоғамды қылмыстан сақтауда ерлікпен қаза тапқан полиция қызметкерлері әрқашан аудан жұртының жадында қалары анық.
Аудан тұрғындарының өмірін қорғау жолында қылмыскердің ажал оғына кеудесін тосқан милиция капитаны Мұрат Өмірбековтің, полиция лейтенанттары Талғат Қозыбаевтың, Есентұрсын Бектұрсыновтың, қызмет бабында қаза тапқан полиция лейтенанты Бақыткелді Ибраимовтың, полиция майоры Алтынбай Қойшыбаевтың ерлік істеріне әрдайым тағзым етеміз. Өз қызметін адал атқарып, ерліктің үлгісін көрсеткен азаматтарымыздың есімі кейінгі буынға өжеттік пен батылдықтың өнегесі болып қала береді.
Төл мерекеде қоғамдық тәртіпті сақтау, азаматтардың құқықтары мен бостандықтарын қамтамасыз ету және қылмыспен күрес, оның алдын алу жолындағы қажырлы еңбектеріңізге сәттілік тілей отырып, бүгінгі жарысқа қатысқалы отырған командаларға жоғары деңгейде ойын көрсетулеріне шын жүректен тілектеспін!”- деді, аудан басшысы өз сөзінде.
Айта кетейік, Мемлекет басшысы Қасым-Жомарт Кемелұлы Тоқаевтың «Заң мен тәртіп» қағидаты аясында құқық қорғау саласын нығайту, материалдық-техникалық базаны жетілдіру және қоғамдық қауіпсіздікті қамтамасыз ету бағытында ауданымызда ауқымды жұмыстар атқарылып жатыр.
Осы бастамалар аясында Шиелі аудандық полиция бөлімінің материалдық-техникалық әлеуетін арттыруға ерекше көңіл бөлінуде. Соңғы жылдары бөлімге 7 JAC маркалы қызметтік автокөлік, кезекшілік бөлімшесі мен уақытша ұстау изоляторына 2 «Газель» автокөлігі беріліп, жалпы саны 9 қызметтік көлікпен қамтамасыз етілді.
Сондай-ақ, аудан көлемінде Жедел басқару орталықтары іске қосылып, қоғамдық тәртіп пен азаматтардың қауіпсіздігін қамтамасыз ету ісіне заманауи технологиялар енгізілуде.
Бүгінде аудан аумағында қоғамдық қауіпсіздікті қамтамасыз ету және құқық бұзушылықтардың алдын алу мақсатында 72 бейнебақылау камерасы тұрақты жұмыс жасап тұр.
Шара барысында құқық қорғау органдарының қызметкерлері арасында өтетін аудандық волейбол турниріне ресми түрде старт берілді.
Жарыстың басты мақсаты — салауатты өмір салтын насихаттау, құқық қорғау органдары қызметкерлері арасындағы өзара ынтымақтастықты нығайту және бұқаралық спортты дамыту.
@Шиелі ауданы әкімінің баспасөз қызметі.
