Мерекелік шара Ұлы Отан соғысында қаза тапқан жауынгерлерді еске алумен басталып, жиналған қауым майдан даласында ерлікпен қаза тапқан батырлардың рухына құрмет көрсетті. Алаңда патриоттық рух ерекше сезіліп, соғыс жылдарының тарихи маңызы мен Жеңістің құндылығы кеңінен дәріптелді.
Салтанатты жиында сөз сөйлеген аудан әкімі Айтбай Жандарбеков тұрғындарды Ұлы Жеңістің 81 жылдығымен құттықтап, ардагерлерге көрсетілетін құрметтің әрдайым жоғары болуы тиіс екенін атап өтті.
— Жеңіс мерекесі – майдан даласында жанын қиған батырларымыздың ерлігіне, тылдағы тынымсыз еңбек иелерінің қажыр-қайратына тағзым ететін қасиетті күн. Батыр бабаларымыздың ерлігі мен елге деген адалдығы – кейінгі ұрпаққа мәңгілік өнеге. Біз олардың алдында әрдайым қарыздармыз, — деді аудан басшысы.
Сонымен қатар, аудан әкімі өз сөзінде Мемлекет басшысының Жарлығымен Нұрлыбек Машбекұлы Нәлібаевтың Қазақстан Республикасы Премьер-Министрінің бірінші орынбасары қызметіне тағайындалуына тоқталып, бұл ел дамуына зор үлес қосқан тәжірибелі басшыға көрсетілген жоғары сенім екенін жеткізді.
Сондай-ақ Президент Жарлығымен Мұрат Нәлқожаұлы Ергешбаевтың Қызылорда облысының әкімі болып тағайындалуы өңірдің тұрақты дамуы мен сабақтастық саясатының айқын көрінісі екенін атап өтті. Аудан басшысы жаңа басшылықпен бірге Сыр өңірінің әлеуметтік-экономикалық дамуы жаңа деңгейге көтерілетініне сенім білдірді.
Жиын барысында аудан әкімі Мемлекет басшысы Қасым-Жомарт Кемелұлы Тоқаевтың ардагерлерге қатысты айтқан сөзін де ерекше атап өтті.
— «Біз отандастарымыздың қайтпас қайсарлығы мен қажырлы еңбегін ешқашан ұмытпаймыз. Жанқиярлық пен ерліктің озық үлгісін көрсеткен батырларымыздың есімін әрдайым ұлықтаймыз. Ардагерлерімізге қамқорлық жасап, қолдау білдіреміз», — деген Президент сөзінің маңызы зор, — деді ол.
Салтанатты шара барысында Ұлы Отан соғысында қаза тапқан боздақтарды еске алу мақсатында бір минут үнсіздік жарияланып, ескерткішке гүл шоқтары қойылды. Жиналған жұрт майдангерлер рухына тағзым етіп, ел қорғаған ерлердің есімін құрметпен еске алды.
Мерекелік кеш соңы аудан өнерпаздарының концерттік бағдарламасына ұласты. Өнер иелері патриоттық әндер орындап, соғыс жылдарындағы тарихи туындыларды шырқап, көпшілікке ерекше әсер сыйлады.
Айта кетейік, Екінші дүниежүзілік соғыс жылдары Шиелі ауданынан 6 мыңнан астам азамат майданға аттанып, олардың 4407-сі туған жерге оралмаған. Бүгінде аудан көлемінде 137 майдангердің есімі көшелерге беріліп, батырлардың ерлігі ел жадында мәңгі сақталып келеді. Бұл – ерлікке тағзым мен ұрпақ жадындағы мәңгілік құрметтің айқын белгісі.
@Шиелі ауданы әкімінің баспасөз қызметі
