Кездесу барысында аудан басшысы сұрапыл соғыс жылдарында «Барлығы майдан үшін, барлығы Жеңіс үшін!» деген ұранмен таңның атысынан күннің батысына дейін тынымсыз еңбек еткен тыл еңбеккерлерінің ерен еңбегіне алғыс білдіріп, оларды Жеңіс мерекесімен құттықтады.
— “Ұлы Жеңіс — майдан даласында қан кешкен батырларымыздың ғана емес, тылда табандылық танытып, бар қажыр-қайратын ел үшін арнаған еңбек адамдарының да жеңісі. Сіздердің ерліктеріңіз бен еңбектеріңіз кейінгі ұрпаққа әрдайым өнеге,” — деді аудан әкімі.
Алғашқы кезекте аудан басшысы Ұлман Қойтанова анамыздың шаңырағына барып, құрмет көрсетті. Ұлман ананың ұлы Қыдырбаев Мақсат Тұрарұлы 2017 жылы жауынгерлік міндетін орындау кезінде ерлікпен қаза тапқан. ҚР Президентінің 2017 жылғы 2 мамырдағы Жарлығымен Мақсат Тұрарұлына «Жауынгерлік ерлігі үшін» медалі табысталған.Аудан әкімі Ұлман анамызға сабыр мен амандық тілеп, ел үшін жанын қиған ерлердің есімі халық жадында мәңгі сақталатынын жеткізді.
Сонымен қатар, аудан басшысы Серік Әбдиев ағамыздың отбасына да арнайы барып, тағзым білдірді. Серік Әбдиев ағамыздың ұлы Ержан Әбдиев 1995 жылы Тәжік-Ауған шекарасындағы әскери қимылдар кезінде қаза болған. Ержан Әбдиевке ҚР Президентінің 1996 жылғы Жарлығымен «Жауынгерлік ерлігі үшін» медалі табысталған.
Сондай-ақ, мереке қарсаңында тыл ардагерлері 98 жастағы Ишанқұл Асанұлы, 90 жастағы Айтжан Алиева, 90 жастағы Мейрамбек Маханшаұлы және 85 жастағы Қали Дүйсенманұлының шаңырақтарына арнайы барып, құрмет көрсетілді.
Кездесу барысында аяулы аналарымыз бен ардақты әкелерімізге сый-сияпаттар табысталып, ізгі тілектер мен ақжарма лебіздер білдірілді.
Айта кетейік, Ұлы Жеңісті жақындатуда тыл еңбеккерлерінің үлесі орасан зор болды. Соғыс жылдары Қазақстан майданды азық-түлікпен, киім-кешекпен және қару-жарақпен қамтамасыз етуде өлшеусіз еңбек сіңірді. Тарихи деректерге сүйенсек, майданға атылған әрбір он оқтың тоғызы Қазақстанда жасалған.
Бүгінде аудан бойынша 135 тыл ардагері бар. Ел үшін еңбек еткен ардагерлердің өнегелі жолы мен батырлардың ерлігі ешқашан ұмытылмайды.
@Шиелі ауданы әкімінің баспасөз қызметі.
