Алпамыс батыр атындағы дене шынықтыру-сауықтыру спорт кешенінде өтіп жатқан жарыс спорт жанашырлары Ғалымжан Бердиев пен Анарбек Омаровты еске алуға арналды. Турнирге 2013-2014 жылы туған жасөспірім ұлдар мен 2012-2013 жылы туған жасөспірім қыздар қатысуда.
Салтанатты ашылу рәсіміне аудандық дене тәрбиесі, спорт және туризм бөлімінің басшысы Махмут Рахымжанов, еркін күрестен ұлағатты ұстаз әрі бапкер Орынбек Жолшиев және Ғалымжан Бердиевтің бауыры Жомар Бердиев қатысып, жас балуандарға сәттілік тіледі. Олар өз сөздерінде спорттың өскелең ұрпақ тәрбиесіндегі маңызына тоқталып, жарысқа қатысушыларға тартысты белдесу мен жеңіс рухын тіледі.
Дәстүрлі додаға Қырғызстан Республикасынан, сондай-ақ Ақтөбе, Алматы, Қызылорда, Түркістан, Жамбыл облыстары мен Алматы және Шымкент қалаларынан келген 8 команда құрамындағы 250-ге жуық спортшы қатысып жатыр. Жас балуандар бірнеше салмақ дәрежесі бойынша бозкілемде бақ сынап, өз өңірлерінің намысын қорғамақ.
Аталған турнир жасөспірімдер арасында еркін күресті дамытуға, талантты спортшыларды анықтауға және олардың тәжірибе алмасуына мүмкіндік береді. Сонымен қатар, жарыс жастар арасында салауатты өмір салтын насихаттап, спортқа деген қызығушылықты арттыруды көздейді.
Тартысты бәсеке 16 мамыр күні өз мәресіне жетіп, үздік спортшылар арнайы марапатталады.
