Ауыл тұрғындарымен өткен кездесулер барысында аудан әкімі Мемлекет басшысы мен Үкіметтің қолдауымен аудан көлемінде жүзеге асырылып жатқан ауқымды жобаларға, әлеуметтік-экономикалық даму көрсеткіштеріне және алдағы жоспарларға кеңінен тоқталды. Сонымен қатар, елді мекендердің инженерлік-инфрақұрылымын жақсарту, халықтың тұрмыс сапасын арттыру, ауылдарды абаттандыру мен көркейту бағытындағы жұмыстардың жүйелі түрде жалғасатынын атап өтті.
Бәйтерек ауылдық округінде ауылдың кіреберісіне арка мен ауыл паспорты орнатылып, Достық көшесіне ағымдағы жөндеу жұмыстары жүргізілді. Сондай-ақ, аталған көше бойына жаңа аялдама қойылды. Бидайкөл ауылындағы Жүсіпов Раш, Хан Леонтий, Досжанов Әбдіқалық және Мәлике Басанова көшелеріне көше жарығы орнатылды. Бұдан бөлек, Сартай Маханбетова және Зияда Пірімбетов көшелеріне жаяу жүргіншілер жолы салынып, тұрғындардың қауіпсіз қозғалысына қолайлы жағдай жасалды. Сонымен қатар, елді мекендегі Л-1 аяқ су каналы мен ауылішілік арықтар толық тазаланып, қазу жұмыстары жүргізілді.
Еңбекші ауылдық округінде ауылішілік қуыс көшелерге жарық бағаналары орнатылды. Атап айтқанда, Е. Бектұрсынов, А. Құнанбаев көшелері аралығына 13 бағана, Б. Оразов, Е. Бектұрсынов көшелері аралығына 10 бағана, М. Мәметов, Е. Бектұрсынов көшесіне 6 бағана және Ғ. Мұратбаев көшесіне 9 бағанаға түнгі жарық шамдары қойылды. Қоғамдық қауіпсіздікті қамтамасыз ету мақсатында ауыл ішіне және сыртына орнатылатын 4 бейнебақылау камерасы сатып алынды. Сонымен қатар, аудан тұрғындары үшін маңызды көлік қатынасы желілерінің бірі саналатын «Самара – Шымкент – Еңбекші» автожолының 4,3 шақырым бөлігі күрделі жөндеуден өтуде.
Айта кетейік, аудан көлемінде жол инфрақұрылымын жақсарту бағытындағы жұмыстар кезең-кезеңімен жалғасуда. Соның бірі – «Шиелі – Тайқоңыр» автожолына жүргізілген жөндеу жұмыстары. Аталған жоба «Kazatomprom» ұлттық атом компаниясының еншілес мекемесі «KAP Logistics» серіктестігінің қолдауымен жүзеге асырылып, 13 шақырым жол толық жөндеуден өтті.
Жиделіарық ауылдық округінде де бірқатар маңызды жобалар жүзеге асырылуда. Ауылдық округ бойынша ішкі жолдардың жалпы ұзындығы 10,11 шақырымды құраса, оның 8,63 шақырымына асфальт төселген, ал 1,48 шақырымы қиыршық тасты жол. Сонымен қатар, барлық көшелерге 132 дана жарық диодты шам орнатылып, елді мекеннің түнгі жарықтандыру деңгейі жақсарды. Сондай-ақ, М. Мәметова көшесінің бойында балалар ойын алаңы, жаттығу алаңы, шағын спорт алаңы және «Тағзым алаңы» тұрғындардың игілігіне пайдалануға берілген.
Кездесулер барысында ауыл тұрғындары өз ұсыныс-пікірлерін ортаға салып, ауылдардың әлеуметтік-экономикалық дамуына қатысты өзекті мәселелерді көтерді. Аудан әкімі көтерілген мәселелердің барлығы кезең-кезеңімен шешімін табатынын айтып, халықпен кері байланыс пен ашық диалог әрдайым басты назарда болатынын жеткізді.
Сонымен қатар, жиында айтылған ұсыныстар мен көтерілген мәселелер бойынша тиісті сала басшыларына нақты тапсырмалар жүктеліп, әр мәселенің заң аясында әрі белгіленген мерзімде орындалуын қатаң бақылауға алу тапсырылды.
@Шиелі ауданы әкімінің баспасөз қызметі.
