Аталған жобалар ауыл тұрғындарын сапалы әрі тұрақты электр энергиясымен қамтамасыз етуге, инженерлік инфрақұрылымды жаңартуға және елді мекендердің өмір сүру сапасын арттыруға бағытталған. Қазіргі таңда екі ауылдық округте де электр желілерін қайта жаңғырту жұмыстары жүйелі түрде жүргізілуде.
Бәйгеқұм ауылындағы ВЛ-10/0,4 кВ электрмен жабдықтау желілерін реконструкциялау жобасы бойынша жобалық-сметалық құжаттама әзірленіп, 2023 жылдың 1 желтоқсанында мемлекеттік сараптаманың оң қорытындысы алынған. Жоба аясында ауыл аумағына 10 кВ болатын 12,3 шақырым және 0,4 кВ болатын 23,6 шақырым электр желілері тартылып, 12 дана трансформатор орнату жоспарланған.
Мамандардың айтуынша, бұл жұмыстардың нәтижесінде Бәйгеқұм ауылындағы электр қуатының сапасы артып, желідегі кернеу тұрақтылығы қамтамасыз етіледі. Сонымен қатар ескі бағаналар мен тозығы жеткен желілер жаңартылып, апатты жағдайлардың алдын алуға мүмкіндік туады.
Ал Ақмая ауылында сыртқы электрмен жабдықтау желісінің құрылысына қатысты нақты жұмыстар қолға алынған. Бүгінде мердігер мекемелермен, техникалық және авторлық қадағалау ұйымдарымен келісімшарттар жасалып, құрылыс-монтаж жұмыстары жүргізілуде.
Жоба аясында ауылға 10 кВ болатын 4,267 шақырым және 0,4 кВ болатын 18,61 шақырым электр желілері жүргізіліп, 501 электр бағанасы орнатылған. Сонымен қатар қуаттылығы әртүрлі 7 трансформатор іске қосылып, елді мекеннің электрмен қамту мүмкіндігі айтарлықтай жақсарған.
Аталған жобалар өңірдің инженерлік инфрақұрылымын жаңғыртуға бағытталған маңызды бастамалардың бірі болып саналады. Электр желілерін жаңарту арқылы тұрғындардың тұрмыс сапасын арттырумен қатар, әлеуметтік нысандар мен кәсіпкерлік субъектілерінің де тұрақты жұмыс істеуіне қолайлы жағдай жасалмақ.
Мұндай инфрақұрылымдық жобалар ауылдық елді мекендердің дамуына серпін беріп, халықтың өмір сүру деңгейін көтеруге ықпал етеді.
