Бұған дейін аудандық полиция бөлімінің бастығы қызметін атқарып келген Нұрсұлтан Әлтай Қызылорда облысы Полиция департаменті бастығының орынбасары лауазымына тағайындалды.
Аудан әкімі басшылық қызметте әлеуеті жоғары, білікті кадр, іскер азамат ретінде халық сеніміне лайық қызмет атқарған Нұрсұлтан Әлтайдың еңбек жолына қысқаша тоқталып, құқық қорғау саласындағы қызметтері әркез нәтижелі болғанын атап өтті.
Нұрсұлтан Әлтай ауданда басшылық қызмет атқарған уақытында құқық қорғау саласында мемлекеттік және қоғамдық қауіпсіздікті сақтауда, құқық бұзушылықтарды анықтау мен олардың жолын кесуде сүбелі үлес қосты.
Аудан көлеміндегі криминогендік ахуалды тұрақтандыру бағытында атқарылған профилактикалық жұмыстардың нәтижесінде 2025 жылдың қорытындысымен қылмыстың тіркелу деңгейі біршама төмендеген.
Жиында аудан әкімі Аманжол Сақыпұлы асқан жауапкершілікті талап ететін күрделі саланың тізгінін ұстаған Нұрсұлтан Әлтайға алғыс білдіре отырып, ауданның ең жоғары наградасы – «Құрмет грамотасын» табыстап, естелік сый тарту етті.
Өз кезегінде Нұрсұлтан Әлтай бірлесе атқарған жұмыстардың нәтижесімен бөлісіп, оң өзгерістер мен жақсы жетістіктерді атап өткен барша тілеулес азаматтарға алғысын білдірді.
Актив отырысында аудандық ардагерлер кеңесінің төрағасы Ә.Әйімбетов, аудандық сот төрағасы Р.Алдамбергенов, аудан прокуроры Д.Әбіш және аудандық мәслихат төрағасы Б.Төрахметов өздерінің жылы лебіздерін білдіріп, жаңа қызметіне сәттілік тіледі.
