«Dauletten» қайырымдылық қоры жыл сайын ұйымдастыратын жоба аясында биыл республика бойынша 200 студент 100 000 теңге көлемінде бірреттік шәкіртақы иегері атанды. Ал жоба басталғалы бері жалпы саны 900 студентке шәкіртақы тағайындалған. Форум форматында өткен жиынға еліміздің әр өңірінен келген студенттер қатысты.
Шара барысында «Dauletten» қайырымдылық қорының Президенті Жасұлан Бостандықұлы сөз сөйлеп, қордың қызметі мен «Білімнің жұлдызы» байқауының маңызы туралы айтты.
– «Білімнің жұлдызы» — тек шәкіртақы тағайындайтын жоба емес, жастарға қолдау көрсететін үлкен мүмкіндік алаңы. Біздің мақсатымыз — білімге ұмтылған, белсенді студенттерді ынталандырып, олардың дамуына серпін беру. Биыл да еліміздің түкпір-түкпірінен талантты жастар жиналып отыр. Осындай жастардың жетістігі — еліміздің болашағына жасалған инвестиция», — деді Жасұлан Бостандықұлы.
Форумға ҚР Парламенті Мәжілісінің депутаты Дәулет Мұқаев арнайы қатысып, жастарға ізгі тілегін білдірді.
Сондай-ақ арнайы шақырылған спикерлер — Өркен Кенжебек, Бабур Әділхан және Айгерім Құсайынқызы жастармен кездесіп, өз тәжірибелерімен бөлісті. Олар білімнің маңызы, жастардың дамуы, мақсат қою және жеке өсу тақырыптарында сөз сөйлеп, студенттерге өмірлік кеңестер айтты.
Жиынның екінші бөлімінде жеңімпаз студенттерге арнайы марапаттар табысталып, шәкіртақы сертификаттары берілді.
