Ауыл тұрғындарымен өткен кездесулер барысында аудан әкімі Мемлекет басшысы мен Үкіметтің қолдауымен ауданда жүзеге асырылып жатқан әлеуметтік-экономикалық жобаларға, инфрақұрылымдық жұмыстарға және алдағы кезеңге жоспарланған бастамаларға кеңінен тоқталды. Сонымен қатар, тұрғындардың өмір сүру сапасын жақсарту, инженерлік-коммуникациялық желілерді жаңғырту, елді мекендерді абаттандыру және көркейту бағытындағы жұмыстар жүйелі түрде жалғасатынын атап өтті.
Ақмая ауылдық округінде электр желілері мен бағаналарын жаңарту және трансформаторлар орнату жұмыстарына Қазақстан Республикасының Ұлттық Қорынан қаржы бөлініп, тиісті жұмыстар атқарылды. Ақмая ауылындағы барлық 9 көшеге жарық диодты түнгі жарық шамдары орнатылған. Ауыл спортын дамыту, жастарды бұқаралық спортқа тарту мақсатында А.Құнанбаев көшесінің бойындағы шағын футбол алаңына күрделі жөндеу жұмыстары жүргізілді. Т.Қирабай көшесінің бойынан «Балалар ойын алаңы, жаттығу алаңы мен шағын футбол алаңы» салынды.
Тұран ауылдық округінде ауылішілік көшелерді жарықтандыру ерекшелігі бойынша аудандық бюджеттен қаржы бөлініп Байдүйсен Таркешов көшесі бойына жаңадан 120 вт-тық көше жарығы және Наурызбай Қылышбаев көшесіне жарық бағаналары орнатылды. Қазіргі таңда ұзындығы 19,2 км болатын көшелерге 516 дана көше жарығы іске қосылып, елді мекеннің 81 пайызы көше жарығымен қамтылған. Сонымен қатар, ауыл тұрғындары «Ауыл аманаты» бағдарламасы аясында мемлекеттен қаржы алып кәсіппен айналысуда.
Жуантөбе ауылдық округінде жыл басынан бері ауылішілік электр желілері мен трансформаторларға техникалық қызмет көрсету жұмыстары жүргізіліп, 15 көшедегі түнгі жарық шамдары жөндеуден өткізілді. Сонымен қатар, А.Иманов, Атамекен және Ш.Ділдебаев көшелеріне күрделі жөндеу жұмыстары аяқталды. Қазіргі таңда Абай тұйығы, Абай Құнанбаев, Мәдениет және Достық көшелерінде күрделі жөндеу жұмыстары жүргізілуде.
Ал, Бестам ауылдық округінде ауыл шаруашылығы алқаптарын аяқ сумен қамтамасыз ету және су тапшылығының алдын алу мақсатында Р-12-6 каналы тазаланды. Сондай-ақ, электр энергиясының сапасын арттыру мақсатында тозығы жеткен электр желілері мен бағаналары жаңартылып, жаңа трансформаторлар орнатылды. Бұдан бөлек, ауыл тұрғындарының игілігі үшін жаңа «Бестам» клуб үйі пайдалануға беріліп, мәдени-көпшілік шараларды өткізуге қолайлы жағдай жасалды.
Кездесу барысында тұрғындар өздерін толғандырған мәселелерді көтеріп, ауылдың әлеуметтік және инфрақұрылымдық дамуына қатысты ұсыныс-пікірлерін білдірді. Аудан әкімі көтерілген әрбір мәселе назарға алынатынын айтып, оларды заң аясында кезең-кезеңімен шешу үшін тиісті жұмыстар жүргізілетінін жеткізді.
@Шиелі ауданы әкімінің баспасөз қызметі.
