Мерекелік жиын Қазақстан Республикасының Мемлекеттік Әнұранын салтанатты түрде орындаумен басталды. Алаңға жиналған көпшілік Әнұранды бірге шырқап, мемлекеттік рәміздерге деген құрметін білдірді.
Салтанатты шарада сөз сөйлеген аудан әкімі Айтбай Жандарбеков аудан тұрғындарын Мемлекеттік рәміздер күнімен құттықтап, бұл мерекенің тәуелсіз Қазақстан тарихындағы маңызына тоқталды. Ол өз сөзінде мемлекеттік рәміздер елдің егемендігі мен тұтастығын айқындайтын басты құндылықтардың бірі екенін атап өтті.
– Мемлекеттік рәміздер – халқымыздың бірлігі мен берекесін, тәуелсіздігіміздің тұғырын білдіретін қасиетті белгілер. Көк Туымыз – бейбітшілік пен тұрақтылықтың, Елтаңбамыз – ұлттық болмысымыз бен тарихымыздың, ал Әнұранымыз – елдік рухымыздың айқын көрінісі. Сондықтан әрбір азамат рәміздерді құрметтеп, олардың мәртебесін биік ұстауға міндетті, – деді аудан басшысы.
Мерекелік шара барысында аудандық мәдениет үйінің өнерпаздары патриоттық әндер мен отансүйгіштік рухтағы музыкалық композицияларды орындады. Ел мен жерге деген сүйіспеншілікті дәріптеген концерттік бағдарлама көрермендерге ерекше әсер сыйлап, көпшіліктің ыстық ықыласына бөленді.
Сонымен қатар, салтанатты жиын аясында мемлекеттік қызметке жаңадан қабылданған жас мемлекеттік қызметшілер мен құқық қорғау органдарының қызметкерлері ант қабылдау рәсімінен өтті. Олар Қазақстан Республикасына адал қызмет етуге, заң талаптарын сақтауға және халық мүддесіне қалтқысыз еңбек етуге салтанатты түрде серт берді.
Мемлекеттік рәміздер күніне арналған шара барысында қатысушылар ел тәуелсіздігінің басты нышандарына құрмет көрсетіп, жастарды отансүйгіштікке тәрбиелеу мен ұлттық құндылықтарды дәріптеудің маңыздылығына ерекше назар аударды.
Шара соңында жиналған қауым Мемлекеттік рәміздердің мәртебесін асқақтату – әрбір қазақстандықтың азаматтық парызы екенін атап өтіп, еліміздің жарқын болашағы мен тұрақты дамуы жолындағы ортақ құндылықтардың мәнін тағы бір мәрте айшықтады.
Шиелі ауданында ұйымдастырылған бұл тағылымды шара тұрғындардың патриоттық рухын нығайтып, мемлекеттік рәміздерге деген құрметті арттыруға бағытталған маңызды мерекелік іс-шаралардың бірі болды.
@Шиелі ауданы әкімінің баспасөз қызметі.
