Аталған шаруашылық биыл ауыл шаруашылығы дақылдарын әртараптандыру мақсатында 70 гектар жерге дәндік жүгері екті. Егістік алқапқа өңірдің климаттық жағдайына бейімделген, өнімділігі жоғары «ДКС 5709 ФАО 580» гибридті жүгері сорты себілген.
Қазіргі таңда жүгері дақылын дәстүрлі технология бойынша егу жұмыстары белгіленген агротехникалық талаптарға сәйкес жүргізілуде. Егіс алдында топырақ сапалы дайындалып, қажетті өңдеу жұмыстары толық атқарылған. Тұқымдар мұқият іріктеліп, белгіленген мерзімде себіліп, минералды тыңайтқыштар енгізу арқылы мол өнімнің берік негізі қалануда.
Жалпы аудан бойынша биыл 2130 гектар жерге дәндік жүгері орналастырылған. Оның ішінде 2000 гектарға су үнемдеу технологиялары қолданылып, яғни тамшылатып және жаңбырлатып суару тәсілдері арқылы егін егілсе, 130 гектар алқапқа дәстүрлі технологиямен егіс жүргізілген.
Айта кету керек, су үнемдеу технологияларын кеңінен енгізу ауыл шаруашылығы саласының тиімділігін арттырып, су ресурстарын ұтымды пайдалануға мүмкіндік береді.
@Шиелі ауданы әкімінің баспасөз қызметі.
