Санитариялық-эпидемиологиялық бақылау саласында қазіргі таңда мемлекеттік қызметтердің 7 түрі көрсетіледі. Оның 6 түрі өңірлік департаменттер мен аумақтық басқармалар, ал 1 түрі Қазақстан Республикасы Денсаулық сақтау министрлігінің Санитариялық-эпидемиологиялық бақылау комитеті тарапынан көрсетіледі.
Мемлекеттік қызметтердің барлығы «электрондық үкімет» веб-порталы арқылы жүзеге асырылады. Бұл азаматтардың мемлекеттік қызметті алу процесін жеңілдетіп қана қоймай, қызмет көрсетуші мен қызмет алушы арасындағы тікелей байланысты шектеуге мүмкіндік береді. Нәтижесінде мемлекеттік қызмет көрсету процесінің ашықтығы артып, сыбайлас жемқорлық құқықбұзушылықтарының алдын алуға жағдай жасалады.
Мемлекеттік қызмет көрсету барысында Қазақстан Республикасының «Мемлекеттік көрсетілетін қызметтер туралы» Заңының, сондай-ақ мемлекеттік қызметтерді көрсету тәртібін айқындайтын нормативтік құқықтық актілердің талаптарын сақтау тұрақты бақылауда.
Қызмет көрсету мерзімдерінің сақталуы, өтініштерді қараудың белгіленген тәртібі, қажетті құжаттардың талаптарға сәйкестігі және мемлекеттік қызмет алушылардың құқықтарының бұзылмауы – санитариялық-эпидемиологиялық бақылау қызметінің негізгі назарындағы мәселелердің бірі.
Қызылорда облысының санитариялық-эпидемиологиялық бақылау қызметі бойынша 2026 жылдың бірінші жартыжылдығында халықтың санитариялық-эпидемиологиялық саламаттылығы саласындағы рұқсат құжаттарын алу үшін барлығы 616 өтініш түскен.
Оның ішінде 381 өтініш қанағаттандырылып, тиісті рұқсат құжаттары берілді, ал 235 өтініш бойынша заңнама талаптарына сәйкес дәлелді бас тартулар ұсынылды, 2 қызмет тоқтатылып, 3 құжат қайта рәсімделді, 29 құжатқа түзетулер енгізілді.
Мемлекеттік қызмет алушылардың басым бөлігі эпидемиялық мәні жоғары объектінің халықтың санитариялық-эпидемиологиялық саламаттылығы саласындағы нормативтік құқықтық актілерге сәйкестігі туралы санитариялық-эпидемиологиялық қорытынды беру қызметіне жүгінген.
Жүргізілген талдау мемлекеттік қызметтерге деген сұраныстың жыл сайын артып келе жатқанын көрсетеді. Атап айтқанда, 2025 жылдың сәйкес кезеңімен салыстырғанда мемлекеттік қызмет алушылар саны екі есеге өскен.
Бұл көрсеткіш санитариялық-эпидемиологиялық саладағы мемлекеттік қызметтердің қоғам мен кәсіпкерлік субъектілері үшін маңыздылығын көрсетеді.
Қызылорда облысының санитариялық-эпидемиологиялық бақылау департаменті мемлекеттік қызмет алушылардың құқықтары мен заңды мүдделерінің сақталуына ерекше мән береді.
Егер мемлекеттік қызметті алу барысында қызметкерлер тарапынан қандай да бір кедергілер немесе заңсыз әрекеттер орын алған жағдайда, қызмет алушылар Қызылорда облысының санитариялық-эпидемиологиялық бақылау департаментінің 23-70-22 сенім телефонына хабарласа алады.
Әрбір өтініш назарға алынып, қолданыстағы заңнама талаптарына сәйкес қаралады.
Г. Сыздыкова
Қызылорда облысының СЭБД басшысы
