Қазақстан Республикасының қорғаныс министрінің бірінші орынбасары – Қазақстан Республикасының Қарулы Күштерінің
Бас Штабы бастығының 2026 жылғы 1 шілдедегі бұйрығына сәйкес Қазалы аудандық қорғаныс істері бөлімінің бастығы болып Сейтханов Нұрлыбек Қалыбекұлы тағайындалды.
Нұрлыбек Қалыбекұлы – 1986 жылы 8 желтоқсанда дүниеге келген.
Білімі жоғары. 2004 жылы Т. Бигельдинов атындағы Қарағанды Республикалық әскери мектебін және 2008 жылы Құрлық әскерлерінің әскери институтын «Командалық-тактикалық мотоатқыштар әскері» мамандығы бойынша тәмамдаған.
2013 жылы Қорқыт ата атындағы Қызылорда мемлекеттік университетінде «Құқықтану» мамандығы бойынша жоғары білім алған.
Еңбек және әскери қызмет жолын 2008 жылы Қазақстан Республикасы Қарулы Күштерінде взвод командирі ретінде бастап, кейін білім беру саласында алғашқы әскери дайындық пәнінің мұғалімі болып қызмет атқарған. 2013-2014 жылдары келісімшарт негізінде әскери қызметке қайта қабылданып, Атырау облысы Жылыой аудандық қорғаныс істері жөніндегі бөлімінің бастығы, 2014-2017 жылдары Қызылорда облысы Шиелі аудандық қорғаныс істері жөніндегі бөлімінің бастығы, 2017-2023 жылдары Қызылорда облысының қорғаныс істері жөніндегі департаментінде кадр жұмысы, әскери қызметке қабылдау және әскерге шақыру бағыттарында жауапты басшылық лауазымдарды абыроймен атқарған.
2023 жылдың қыркүйек айынан бастап осы уақытқа дейін Қызылорда облысының қорғаныс істері жөніндегі департаментінің Әскерге шақыру және әскерден тыс жұмыс басқармасының мерзімді әскери қызметке әскерге шақыру бөлімінің бастығы қызметін атқарып келді.
Аудан әкімі Нұрлыбек Қалыбекұлын жаңа қызметімен құттықтай отырып, ауданның қорғаныс қабілетін нығайту, әскери-патриоттық тәрбиені дамыту және жүктелген міндеттерді сапалы орындау жолындағы қызметіне сәттілік тіледі.
