Айта кетейік, бұған дейін Шиелі ауданына қарасты Нартай ауылында 21 жастағы жігіт өзінен алты жас кіші келіншегін жүкті қылғаны үшін сотталған. Сот азаматқа “кәмелетке толмаған қызды төсек қатынасына тартты” деген баппен 12 жыл бас бостандығынан айырды.
Ал мұндай ауыр жазаға екі жастың ата-аналары қарсы болып отыр. Тіпті келіншектің өзі де жігітке сүйіп қосылғанын айтқан еді. Сондықтан қос ғашықтың отау құруына үлкендер рұқсат берген. Осылайша ауыл имамына неке қидырған.
Ал өңірдегі орталық мешіттің өкілдері Нартай ауылының молдасы бекітілген неке қию ережелерін сақтамаған дейді.
“Бас имамның бастамасымен, жергілікті тәртіптік кеңес мүшелерінің қатысуымен ол мәселе қаралды. Және Нартай ауылының имамына тиісті қатаң сөгісі берілді. Неке қиюға келген екі жастың АХАЖ бөліміне тіркелген қағазы болу керек. Егер ол болмады дегеннің өзінде арнайы өтініш берген анықтамасы болу керек. Осылар болса, неке қиылады”, — дейді Қызылордадағы орталық мешіттің тәртіптік кеңес мүшесі Қайырбек Отызбаев.
P.S. Осылайша жастардың шаңырақ көтеріп, бақытты боламыз деген үмітін су сепкендей сөндірді. Күйеу баланы соттады, имамды жазалады.
