Сот деректеріне сүйенсек, Б. есімді азамат бұрынғы жұбайы Г.-ны аңду үшін танысы М.-ға жүгінген. Бұл үшін ол 1 миллион теңге төлеген.
Кейін М. осы тапсырманы орындау үшін Д. есімді адамды тапқан. Бірақ уақыт өте келе, Б. дәл осы М. арқылы Г.-ны өлтіруге тапсырыс берген. Бұл жолы ол 3 миллион теңге төлеген.
Соттың мәліметінше, мұндай әрекетке ер адам қызғаныш пен мүліктік келіспеушіліктер себеп болғандықтан барған.
Д. есімді қылмыскер Павлодар қаласындағы Баратов көшесінде Г.-ны аңдып жүріп, артынан келіп, пышақпен бірнеше рет кеуде және бет тұсынан соққы жасаған.
Алайда дәл осы сәтте жақын маңнан автокөлік шығып, шабуылдаушы қашып кеткен. Осы жағдай Г.-ның өмірін сақтап қалуға себеп болды – оған уақытылы медициналық көмек көрсетілген.
Сотта Г. қылмыскерлерге ең жоғары жаза тағайындауды сұраған. Алайда Б. мен М. өз кінәларын мойындамай, ақтауды сұрады, ал Д. өзінің әрекетін тонау ретінде қайта саралауды өтінген.
Сот Б., М. және Д. есімді үш азаматты кінәлі деп танып, әрқайсысына 11 жыл 3 ай мерзімге орташа қауіпсіздік деңгейіндегі мекемеде жаза өтеу туралы үкім шығарды.
PS. Сонымен қатар сот шешімімен жәбірленушіге 8,8 миллион теңге көлемінде моральдық өтемақы мен өкіл қызметіне кеткен шығындар өндірілді.
Фото:sputnik.kz
