Оқиға 23 шілде күні таңғы 6 шамасында орын алған. Қираған аумақтың көлемі шамамен 250 шаршы метрді құрайды. Аудандық білім бөлімінің хабарлауынша, бетон конструкциясының бір бөлігі шатырымен бірге опырылған.
Құлаған мектептің ғимараты 2009 жылы салынған, қазіргі таңда бұл оқу орнында 1400-ден астам оқушы білім алады. Апат тек акт залының төбесінде болған, ал мектептің басқа бөлмелері қалыпты жағдайда.
Білім бөлімінің өкілдері техникалық тексерулер жүргізіліп жатқанын хабарлады. Қазіргі таңда түпкілікті қорытынды дайын емес, оны техникалық қадағалау қызметі әзірлеп жатыр. Егер 1 қыркүйекке дейін жөндеу жұмысы аяқталмаса, оқушыларды басқа мектептерге уақытша ауыстыру нұсқасы қарастырылып отыр.
«Мектеп ғимаратының кепілдік мерзімі аяқталған. Біз жаңа оқу жылы басталғанға дейін жағдайды қалыпқа келтіруге бар күшімізді саламыз», – деді Қарақия ауданының білім бөлімі.
Себептер кейінірек анықталады
Оқиға бойынша арнайы комиссия құрылды. Қираудың нақты себептері техникалық сараптама нәтижесі шыққаннан кейін жария етіледі.
Фото: видео скрин
