Бұл туралы облыстық полиция департаменті мәлімдеді. Тергеу деректеріне қарағанда, әйел «TikTok» желісінде деструктивті діни идеологияны насихаттайтын аудио-бейнематериалдар жүктеп отырған. Ол діни алауыздық тудыру белгілері бар және терроризмді қолдайтын мазмұндағы жазбалар жариялаған. Экстремизмге қарсы іс-қимыл басқармасы мен Ұлттық қауіпсіздік комитетінің Қызылорда облысы және Байқоңыр қаласы бойынша департаменті бірлесіп жүргізген жедел шаралар нәтижесінде күдікті ұсталды. – Қылмыстық кодекстің 174-бабы («Әлеуметтік, ұлттық, рулық, нәсілдік, тектік-топтық немесе діни алауыздықты қоздыру») және 256-бабы («Терроризмдi насихаттау немесе терроризм актiсiн жасауға жария түрде шақыру») бойынша қылмыстық іс қозғалды. Қызылорда қалалық сотының үкімімен ол кінәлі деп танылып, 7 жылға бас бостандығынан айырылды, – делінген полиция мәлімдемесінде.
Фото: Қызылорда облыстық полиция департаменті
