Ағымдағы жылы басынан беру Конго-Қырым геморрагиялық қызбасынан 20 күдікті науқас тіркеліп, оның 11-нің диагнозы клиникалық-зертханалық және эпидемиологиялық жолмен нақтыланды.
Назар аударарлық мәселе – диагнозы нақтыланған 11 жағдайдың 72 пайызында науқастардан сұрау барысында тікелей кене шағу фактісі болмаған, олар мал күтімі немесе егістікте егін егумен айналысқан. Яғни егістікте немесе ауылшаруашылығы жануарларын күту барысында кенемен немесе қанымен жанасу болуы мүмкін.
Осыған сәйкес тұрғындарға берілетін кеңес- қазіргі таңда жаз мезгіліне байланысты табиғатқа демалысқа шыққанда, егіндік, мал шаруашылығы, балық аулау т.б далалық жағдайда еңбекпен шұғылданғанда төмендегі кенеден сақтану шараларын ұсынамыз:
• табиғатқа шыққанда ауылшаруашылық малдарына, үй жануарларына (мал қырқымы, сиыр сауу, т.б.) күтім жасағанда мейлінше ақшыл түсті жабық киім кию, шалбардың балағын етік ішіне немесе шұлық ішіне салып, жеңді түймелеп, кене кірмеу жағдайын жасау;
• мал қырқымы, мал сою кезінде қорғаныс киімдерімен жұмыс жасау, ұзын резеңке қолғап, алдына резеңке алжапқыш және ұзын қоныш етік кию;
• кенелердің жабысуын болдырмауға арналған түрлі жақпа майлар, аэрозольдер түріндегі үркіткіш заттар (репелленттер) пайдалану;
• егер сіз КҚГҚ-нан қолайсыз елді мекен тұрғыны болсаңыз, жоспарлы кенеге қарсы өңдеу жұмыстарының сапалы жүргізілуіне ат салысып, жеке иелігіңіздегі мал қора, мал бастарының толық залалсыздандырудан өтуін қадағалаңыз.
Әлия Әбдіқайымова
Қызылорда облысының СЭБД басшы орынбасары
