Осыған орай Қазалы мәдени-демалыс кешеніндегі «Тағзым» аллеясында ядролық қару сынағының құрбандарын мен сол кезеңді көзбен көрген ардагерлер мен аға буын өкілдерін еске алуға арналған шара өтті.
Шарада аудан әкімінің орынбасары Дәурен Тлеумбетов сөз сөйлеп, бұл күннің адамзат тарихындағы маңызына тоқталды. Сондай-ақ күллі адамзат баласына зор қауіп төндірген полигон зардаптарын болдырмау бағытындағы қажырлы еңбек еткен ардагерлер қауымына шынайы алғысын білдірді. Сондай-ақ Семей сынақ полигонының зардабын жоюға атсалысқан ардагерлерге аудан әкімінің міндетін атқарушы Жалғас Сүйеубаевтың «Алғыс хаты» мен арнайы сый-сияпаттар табыстады.
Жиында ядролық қару сияқты алапат күштің зардабын көріп дүниеден өткен арда азаматтардың рухына құран бағышталып, ескерткішке гүл шоқтары қойылды.
Мұнан соң «Семей-Невада» қоғамдық бірлестігінің Қазалы аудандық өкілі Өмірбек Күлімбетов сөз сөйлеп, тарих парағына өшпестей із қалдырған ядролық сынақ зардаптарынан сыр тартып, еліміздің амандығы мен тыныштығын тіледі.
Осыдан 34 жыл бұрын, яғни 1991 жылы 29 тамызда Қазақстан Президентінің Жарлығымен бүкіл әлемге белгілі Семей ядролық сынақ полигоны жабылды. Бұл адамзат тарихындағы аса маңызды тарихи оқиға ретінде қабылданды. 2009 жылы 30 қазанда еліміздің тарапынан Біріккен Ұлттар Ұйымы Бас Ассамблеясының Бірінші комитетіне 29 тамызды ядролық қарудан бас тартудың Халықаралық күні деп жариялауды ұсынды. Ұсыныс қолдау тауып, содан бері бұл күн – Ядролық сынақтарға қарсы іс-қимылдың халықаралық күні ретінде аталып өтіліп келеді.
