Облыс көлемінде туберкулез ауруының 259 жаңа жағдайы тіркелді. Өткен жылдың осы мерзімімен салыстырмалы түрде аурушаңдық көрсеткіші 3,8-ге төмендеген. Алғаш тіркелген туберкулез жағдайының 90% тыныс алу жолдарының туберкулезі, оның ішінде 25,4% туберкулездің жұқпалы түрі құрады. Туберкулез жұқтырған науқастарымен қарым-қатынаста болған тұрғындар медицина қызметкеткерлерінің жіті бақылауында, 4 324 адам алгоритм көрсеткіштеріне сай тексеріп-зерттеуден және фтизиатр мамандарының бақылауынан өтті.
Балалар арасында туберкулездің 26 жағдайы және жасөспірімдер арасында аурушаңдықтың 15 жағдайы есепке алынды. Туберкулезден асқыну және өлім-жітім жағдайлары тіркелген жоқ.
Алдын алу шараларын орындау арқылы бұл дерттің алдын алуға болады. Перзентханада сәбилерге егілген туберкулезге қарсы екпе адамды ұзақ уақыт бойы осы аурудан қорғайды. Облыста дүниеге келген 10 604 сәбидің 95 пайызы туберкулез инфекциясына қарсы оптималды деңгейде екпемен қамтылды. Медициналық көрсетілімдеріне байланысты кейінге шегерілген сәбилерге екпе жұмыстары жергілікті медицина мекемелерінде жоспарға алынды. Профилактикалық тексерулер мен скринингтерден уақытылы өтіп тұру да маңызды.
Туберкулез жазылатын ауру. Сондықтан ауру белгілері байқалған сәтте дереу медициналық көмекке жүгіну маңызды.
Гульмира Сыздыкова
Қызылорда облысының СЭБД басшысы
