Бұл бастама алғаш рет 2024 жылы көктемде еліміздің бірқатар өңірлерінде болған су тасқынынан кейін, Солтүстік Қазақстан облысында қолға алынған болатын. «Ауыл» партиясының бастамасымен құрылған студенттік және жастар жасақтары табиғи апаттан зардап шеккен тұрғындарға көмек көрсету мақсатында жұмысын бастаған еді. Аталған игі бастамаға Мемлекет басшысы Қасым-Жомарт Тоқаев та жоғары баға беріп, Астана қаласында өткен мәслихат депутаттарының форумында қолдау білдірген болатын.
Өңірімізде құрылған төрт негізгі жасақ — «Жігер» механикалық жасағы, «Қайсар» құрылыс жасағы, «Жалын» сервис жасағы және «Білім» педагогикалық жасағы — оқу жылының басталуына байланысты ресми түрде өз қызметтерін аяқтады.
Жасақ құрамына енген студенттер жаз айларында «Абзал и К», «Таң ЛТД», «Асар» құрылыс компаниялары мен «Жалын» сауықтыру лагерінде ақылы түрде жұмыс жасап, өз мамандықтарына сай тәжірибе жинақтады. Жұмысын сәтті аяқтаған студенттерге «Ауыл» партиясының Қызылорда облыстық филиалының төрағасы Садық Шоңмұрынұлы және “Мейірім құшағы” комиссиясының төрайымы Динара Дүйсенбекқызы алғыс білдіріп, арнайы алғыс хаттар табыстады. Шара барысында келген қонақтарға арналған мерекелік бағдарлама ұйымдастырылып, концерттік номерлер ұсынылды.
Алдағы уақытта бұл бағыттағы жұмыстарды кеңейтіп, көбірек студенттерді қамту жоспарланып отыр.
