«Мерейлі отбасы» ұлттық байқауы – осындай бірлігі бекем, берекесі ұйысқан шаңырақтарды дәріптеп, елге үлгі етуді мақсат тұтады. Биыл бұл игі дәстүр 11-ші мәрте жалғасын тауып, айрықша тарихи мәнге ие болды.
Қызылорда қаласындағы «Достық» үйінде өткен «Мерейлі отбасы -2025» ұлттық байқауының облыстық кезеңінің жеңімпаздарын марапаттау шарасына облыс әкімінің орынбасары Мейрамбек Шермағанбет қатысып, отбасы құндылығының маңызы мен тағылымдық мәнін атап өтіп, республикалық кезеңге жолдама алған әулеттерді марапаттады.
Байқаудың облыстық кезеңіне Қазалы ауданынан қатысқан Балтөреевтер әулеті «Берекелі отбасы» номинациясының иегері атанды.
Берекесі тасыған Балтөреевтер әулеті – еңбекпен өрілген ғұмырдың, ынтымақ пен татулықтың шынайы үлгісі.
Шаңырақтың тірегі – Аманжол ағамыз еңбек жолын Өркендеу ауылында механизатор болып бастап, кейін ауылдық кеңесте депутат ретінде ел сенімін арқалады. Егін даласының бригадирі қызметін абыроймен атқарып, тер төккен бейнетінің зейнеті ретінде «Еңбек үздігі» медалімен марапатталған ардақты азамат.
Жұбайы – Жұпар анамыз ауыл шаруашылығының сан саласында табанды еңбек етіп, сауыншы да, күрішші де, тігінші де болған. Ұрпақ өрбіткен, елдің игілігі үшін тер төккен ардақты ана «Күміс алқа» иегері, «Медаль материнства» марапатының иесі.
Бүгінде шаңырақ көтергеніне 55 жыл толған қадірлі ата — әжі – 5 бала, 19 немере, 5 шөберенің қызығына бөленіп отырған ақ тілеулі әулет.
Бұл отбасы – еңбексүйгіштігімен, татулығы мен бірлігінің беріктігімен, ұлттық дәстүр мен салт-сананы дәріптеуімен көпке өнеге.
Балтөреевтер әулетін шын жүректен құттықтаймыз!
Берекелі шаңырақтарыңыз шаттық пен бақытқа толып, ұрпағыңыздың абыройы әрдайым асқақтай берсін!
