Әйтеке би кенттік Мәдениет үйінде өткен мәдени шараға аудан әкімінің орынбасары Мұрат Әбсұлтанов қатысып, қайталанбас өнер иесінің өмір жолы мен ауданның мәдениет саласының дамуына қосқан еңбегін ерекше атап өтті.
— Саналы ғұмырының 40 жылдан астам уақытын ауданымыздың мәдениет саласының дамуына арнаған Галя Оспанды еңбегі, шығармашылығы бүгінгі жас буынға үлкен мұра болып қалды. Апайымыздың алғашқы өнер жолындағы өзінің орындаған «Ақбұлақ», халық әні «Дедімай-ау», «Дударай» әндері әлі күнге дейін тыңдармандардың жүрегінде жаңғырып тұр. Галя Оспанқызының өнер жолында әншілік қабілеттен бөлек, бірнеше фильмдерге түсіп, ерекше шеберлігімен таныла білді. Сонымен бірге аудандық мәдениет Үйі жанынан құрылған «Өнеге» әжелер ансамблінің жетекшісі ретінде де өнерлі әжелермен бірге талай шыңдарды бағындарды. Галя апайымыздың өнер жолындағы көп жылғы еңбегі бағаланып, 2013 жылы ҚР Мәдениет және спорт Министрлігінің «Мәдениет саласының үздігі» төс белгісімен марапатталды. Өнер жолында туған жердің атын шығарып, биік тұғырдан көрсете білген өнер иесінің есімі, оның еңбегі, шығармашылығы мәңгі халқының жүрегінде сақталады, — деді Мұрат Байғабылұлы.
«Өнерімен өрілген өмірі» атты еске алу кешінде Галя Оспанның өнер жолындағы орындаған әндері шырқалып, өнер иесінің өмірдерегінен арнайы бейнеқойылымдар мен арнайы «Өмір жолы» атты көрме көрсетілді.
Кеште сахна саңлағының туыстары, әріптестері, әншінің туған жері Бірлік ауылындағы жерлестері сөз сөйлеп, Галя Оспан жайлы жылы естеліктермен бөлісті.
Мәдени шарада өнер иесінің шырқаған «Аппағым», «Сен мені сағынбайсың ба?», «Махаббат ұшқыны», «Жүрек сыры» және өзінің жетекшілік еткен «Өнеге» әжелер ансамблінің орындауында «Көкем-ай» сынды әндер шырқалды.
