Қазіргі таңда сотталған азаматтарды қоғамға қайта бейімдеу – аса маңызды міндеттердің бірі. Осы бағытта түрлі оңалту бағдарламалары ұйымдастырылып отырады.
М.Саламатов атындағы Қызылорда қызмет көрсету және сервис колледжінің маманы Сулушаш Ибраева «Радиотехника, электроника және телекоммуникациялар» бойынша 72 сағаттық қысқа мерзімді оқыту курсын өткізді. Бұл дәріс осы модуль бойынша жұмыс жасап жатқан азаматтарға жаңа білім үйреніп, жұмыс сапасын арттаруға көмектеседі.
«Кабельдік байланыс желілерін төсеу бойынша операцияларды орындау, кабельдер мен сымдарды бекіту үшін қолданылатын материалдар мен конструкцияларды дайындау және күрделі жағдайларда кабель төсеу жұмыстарын орындау тақырыптарында дәрістер оқылып, кеңінен түсіндірілді. Оқыту барысында сотталған азаматтар ақпаратты толық меңгеріп, білімдерін жетілдірді»,− дейді арнайы пән оқытушысы С.Ибраева.
Сотталған азаматтар курстан өткендігін растайтын арнайы сертификатқа ие болды. Бұл құжат олардың ары қарай жаңа технологияны тез үйренуіне, өнім жасау барысын жеңілдетуге мүмкіндік береді.
«Бұл оқыту жазасын өтеп жатқан азаматтар үшін үлкен мүмкіндік. Курстың негізгі мақсаты сотталған азаматтардың болашақта қоғамнан өз орнын тауып, кәсібін ашып, еңбек етуіне бағытталған. Осы орайда 25 азамат оқытудан сәтті өтті. Басқа да модульдер бойынша алдағы уақытта қысқа мерзімді оқытуды жоспарлап отырмыз. Сондай-ақ еңбек дағдыларын дамыту бойынша ұйымдастырылған курсқа қатысуға ынталы адамдардың саны көбеюде»,− дейді Сотталғандардың еңбегін ұйымдастыру бөлімінің басшысы, әділет майоры А.Абдреймова.
Рәпіш ТӨЛЕП
ҚАЖД №60 мекеменің баспасөз қызметі
